Jah rngai 70hajar ngut ki poiwir na Assam, jubab sha Supreme Court

New Delhi: Palat 70,000ngut ki poiwir kiba don ha Assam, ki la jah rngai noh ha shwa ban beh noh ia ki, ong ka sorkar Assam, ha ka jubab mynta ka sngi ia ka  Supreme Court.

“Mynta ngim lap shuh ia ki bad lehse, ki la ia khleh lang bad ki trai shnong” ong U  Solicitor General, U Tushar Mehta, haba iathuh ia ka ben jong U Ranjan Gogoi, Chief Justice ka India.

U Mehta, u iathuh ba ka sorkar Jylla, ka la pynkhreh ban beh noh ia ki, hynrei mynta ki la ia khleh bad ki trai shnong ha ka Jylla.

Katei ka jubab jong ka sorkar Jylla, ka la pynbitar ia ka kashari, ba lada kitei ki 70hajar ki jah rngai, kumta kumno tam ia kito kiba dang don ha ka jingtohkit ha kine ki sngi.

Ka kashari, ka kren bitar jur ba U Chief Secretary, um shym la don satia ha katei ka jingshong bishar mynta ka sngi, kumba la bthah ba un don lang bad katei ka la pynlong ia U Chief Justice, ba un ong “Ngin pynmih da ka hukum ban kem noh ia u”. U Mehta, ula ong ba un sa bthah ia U Chief Secretary, ba un don lang ha kawei pat ka jingshong bishar, hynrei ka kashari, ka la bthah ba un wan noh ha ka Lah Sngi U Blei bad ba um dei ban leit sha Assam, khlem da ioh jingbit na ka kashari.