Kyrshan ka Sonakshi, ba un mih noh u kpa jongka na ka seng BJP

Ka Sonakshi Sinha, hynnin ka sngi, ka la mih shakhmat ban kyrshan ia u kpa jongka, U  Shatrughan Sinha ba un mih noh ialade na ka seng  Bharatiya Janata Party bad ban pyniasoh ialade sha ka seng  Congress bad halor katei ka mat, ka Sinha, ka ong ba ula dei ban leh naduh mynshwa bha.

Haba kren ha ka prokram jong ka Hindustan Times, ka Sonakshi, ka ong “Nga ngeit ba ula dei ban leh naduh kham mynshwa. Um shym la ioh ia ka burom, kaba u dei ban ioh”.

U Shatrughan Sinha, ula ia kynduh ia U Rahul Gandhi, President jong ka seng Congress, ha ka sngi palei ha kaba ula kren shai ba un pyniasoh ialade bad ka seng Congress. “Ka jing pyniasoh kan urlong noh shen bad ngin sa iathuh iaphi ia ka sngi kaba shai bad ngan pyniasoh shen sha ka seng Congress” ong U Shatrughan Sinha.

U Shatrughan Sinha, u dei u dkhot uba la jop ar sien na Patna Sahib Lok Sabbha Seat bad ha kane ka sien, ula duh tiket ruh ialade na katei ka Constituency, ha kaba la pynialeh da U  Ravi Shankar Prasad na katei ka Constituency jong U Shatrughan Sinha.

Ha Bihar, ka BJP ka iatreilang bad ka Janata Dal United, ka Congress pat bad ka  Rashtriya Janata Dal  bad ka Bihar ka phah 40ngut ki dkhot sha Lok Sabbha.