Shillong: Ka Shillong Lajong Football Club bad ka sorkar Meghalaya lem ka Asian Development Bank (ADB) ban hikai bad ban ai jinghikai ia kito kiba kwah ne angnud ban long coach ha ka D License bad C License Coaching Certification. Yn pdiang 312 ngut ki Youth Coach ha Meghalaya khlem kano kano ka jingsiew.
U coach na ri Spain uba dei u UEFA Pro License, kum u Technical Director, u Jose Carlos Rodriguez Hevia, un shim ia ka bynta ban ai ka jinghikai katkum ka Spanish bad ka European Models sha ki 288 ngut kiban shah jied kiba dei jong ka D License & Grassroots Program bad 24 ngut kiban shah jied jong ka C License Program. Kane ka jingai jinghikai kan long shiphew (10) bnai tam, kaban kynthup ia ka jingpule bad ka praktikal.
Hadien ba ki la pyndep ia ka jingshah hikai, ia ka D License Certification Course yn sa pyllong sa ki briew ka AIFF sha ki jaka ban sa pyntip katba ia kiba pyndep ia ka C License Certification Course yn pyllong da ka AFC da ka rukom kaba iapher.
Ki jaka ba jied ban hikai jong ka D License Program kin dei, ha Shillong (ar kynhun), Pynursla, Sohra, Nongstoin, Mawkyrwat, Nongpoh, Bhoi Rymbong, Jowai, Khliehriat, Williamnagar & Tura.
Ia ka C License Program yn pyllong beit ha Shillong ia kiba la dei lypa kiba ioh ia ka AIFF certified D License Coaches.
Kiba kwah ban ioh jinghikai ki lah ban ioh ia ki phom na Shillong Lajong Football Club Office, Hotel Centre Point Building, Khyndai Lad, na ophis ka Meghalaya Football Association Office, JN Stadium, Polo.
Yn sam ruh ia ka jingtip sha ki District Football/ Sports Associations kiba don ha ka jylla.
Ki kyndon ki long ba ki dei ban long 18 snem shaneng, kiba kha ne heh san ha Meghalaya bad ki dei ban don ka jingtip shaphang ka phutbol. Yn kham pyrkhat kyrpang ia ki nongialehkai kiba ialehkai shabar ka jylla, kiba trei ne don ha ki klob, ki skul kum ki coach. Kiba kwah kin hap ban pyndap ia ki phom bad phah sha ophis ka Shillong Lajong FC lane sha ka ophis ka MFAshwa ka 8 tarik Iaiong 2019.
Phi don ban ong eiei?