Mynjur ka dorbar KHADC ia ka mang tyngka ba duna T.48 hajar

Shillong: Ka dorbar mang tyngka ka KHADC ka la pdiang ia ka mang tyngka 2019-20 kaba duna pisa T. 48,540 hajar.
Ia kane ka mang tyngka la wanrah da u Deputy CEM u bah Pyniaidsing Syiem ha ka sngi shong dorbar ka sngi kaba nyngkong bad la mynjur myn hynnin ka sngi kut.
Ka jingmang pisa baroh ban pynlut mynta u snem ka long T. 215,36,17,400 klur bad ka jingmih kan long T. 215,35,68,860 klur.
Ha kane ka jingmang pisa, ka Executive Committee ka la mang ban siew tulop ia ki nongtrei, ban siew ia ki bill, ban pyntrei ia ki kam pynroi bad kiwei.
Haba pynshai kham bha halor kane, u bah Pyniaidsing u la iathuh ba kane ka Executive Committe ka la pynkhreh ban phah shah hikai ia ki nongtrei ka District Council sha ka MATTI khnang ba kin kham sngewthuh kham tbit ha ka rukom treikam na ka bynta ka jingbit jingbiang jong ka Council.
U bah Pyniaidsing ula pyntip ruh ba ka EC ka don ka jingpynkhreh ban pynjyrngam ia ki khlaw ba shrah ka district council nalor kiba bun kiwei ki kam naduh ka tnad khaii pateng, ka tnad ri dohkha, ka tnad enforcement, ka tnad pule puthi bad kiwei.
U la iathuh ba ia ka tnad Sports and Youths Affairs la mang ruh mar 6 lak uwei u MDC na ka bynta ki jingdonkam ki samla bad kiwei ki kam.