Sam pisa U Syiem bad ki myntri, ong U Bah Ronnie

Bah Monarch Shabong

U Bah Ronnie V Lyngdoh, MDC jong ka Hima Mylliem, ula leit rah ia ka mat ia tai ha ka dorbar jong ka Khasi District Council, ha kaba ula kynnoh ba U Syiem jong ka Hima Mylliem lem bad ki myntri, ki iaid kanbas pyrshah, na ka bynta jongu bad ki da sam pisa ruh sha kito kiba kyrshan sha ka liang kaba ki ia mon lang ma ki.
U MDC, u khlem iathuh la U Syiem jong ka Hima Mylliem lem bad ki myntri jongu, ki kyrshan iano, namar ba lehse, katei kam dei ka jingiakren tang hapoh ka iing dorbar jong ka Council, hynrei ka donkam ban iakren halor kato ka T.5lak, kaba la mang da ka tnat District Council Affairs, ban pynlut elekshon bad la katei ka jingbei pisa, ka don ne em ha ka jingkhein, kaba kitei ki kandidet ki pynlut, lane ioh lehse ka long kaba shu sei pahuh da kitei ki myntri bad ki Syiem, sha ka liang ba ki iahap.
Ban kanbas elekshon, haba shu sngap, ngim da dei eh ban peit khmat iano iano, namar ba lada ngi peit khmat ia uwei U Syiem, kumta baroh ki Syiem, kin sngew ngiah noh ban ia kanbas elekshon, nangta lada ngi peit khmat ia uwei U Pastor, kumta kiwei ki Pastor ruh kin ngiah noh ban ia kanbas bad lada ngi kynnoh shuh ba kiba trei politiks, ki dei kiba tuh bad ki riew lali, kumta kito kiba bha bad ki bym lali, kin ngiah noh ban ia kyrsum ha ka politiks bad lada ngi ong pat ba kiba trei politiks, ki dei kiba dih kdang, kiba shait kynthei bad kumta ter ter bad katei kan ailad ia kiba kum kitei ki briew ba kin ia kyrsum ha ka politiks.
Na ka jingkren U MDC ka Mylliem bad lehse na ka jing jubab jong U Executive Member ba peit ia ka kam Elaka, la sngewthuh ba kim ai jingmut ia ki Syiem, ba kin shim bynta ha ka politiks bad haba iakren halor kane ka mat, ngi dei ban kynmaw ba U Bah HS Shylla, CEM barim, ula kren jlew mynsiem, haba ka dorbar Hima, kaba la khot da ka Hima Mylliem, ba kiba poi ki don tang da ki spah ngut ki briew bad katei ka pyni ba u paidlang mynta um sngew don jing iadei shuh bad ki Syiem bad ka mat ka lah ban long ba ki Syiem, ki trei kam tang ha ki saw kynroh jong ki dorbar Hima.
Ka politiks hi ka dei ka sobjek salonsar, ha kaba wat ia u nongbuaid ruh hap ia kdup, kumta ngim dei ban teh lakam iano iano ba kin shim bynta laitluid, wat la ngim mynjur pat ban iatheh pisa.