Beh seng ka HSPDP ia ka kong Fenela, ba kyrshan UDP

Shillong,8 Iaiong:
Ka HSPDP West Khasi Hills bad Maw thadraishan Konstitwensi ha ka jingialang kyrkieh jong ka ha ka miet lah sngi u Blei ka 7 tarik mynta u bnai ka la shim da ka rai kaba tyngeh pyrshah ia ka kong Fenela L Nonglait, kawei na ki nongialam ka HSPDP kaba long ruh ka kyrtong jong katei ka seng na Mawthadraishan Kon stitwensi ha ki ar elekshon ba la dep. Ha katei ka jingialang ka HSPDP ka la shim syndon da ka rai da kaba beh seng ia ka kong Fenela, halor ka nongrim ba ka dei ka nongialeh pyrshah ia ka seng da kaba kyntait ban kyrshan ia u Pastor PBM Basaiawmoit uba ka seng

ka la rai ban kyrshan tylli tylla ha kane ka elekshon MP bad ruh na ka daw ba ka HSPDP ka la kynnoh ba ka kong Fenela ka la pyndonkam bakla ia ka kyrteng u bah Hopingstone Lyngdoh President Rngbah ka seng, kane ka jingshim rai ka HSPDP ka dei tang hadien katto katne kynta ba ka kong Fenela ka la ieng rynsan ha Motphran ban ialap elekshon ua bah Paul Lyngdoh u kyrtong ka UDP.
Katkum ka jingiathuh jong ki nongialam ka HSPDP la ong ba ym tang ki nongialam ka seng kiba la bitar shla ia ka kong Fenela halor katei ka jingleh jong ka hynrei ki la kam ruh wat ki paidbah nongkyrshan ka HSPDP na Mawthadraishan Konstitwensi ruh ki ki la bitar shla ia katei ka nongialam ka seng.
Ha ka jingialang kyrkieh ka HSPDP la donlang u bah PK Pangniang MLA/MDC, President HSPDP West Khasi Hills,W.Mawsor Vice President WKH, LG Nongsiej MDC General Secretary WKH, Tuberlin Lyngdoh President HSPDP Mawthadraishan , Grossper Ryntathiang Secretary HSPDP Mawthadraishan.