Kynnoh U bah Ronnie ba sam pisa ki Myntri, u Syiem ha ka elekshon ba la dep

 Shillong: U Deputy Chief Executive Member ka KHADC u bah Pyniaid Sing Syiem u la ong ba katkum ka Appointment and Succession of Chiefs and Headmen Act 1959 jong ka United Khasi Jaintia Autonomous District Council, ki nongsynshar kiba kynthup ki syiemship, lyngdohship, elakship ban iadon bynta ha ka kam sain pyrthei.

                U Bah Pyniaid u la jubab ia kane halor ka jingkylli ba la wanrah da u MDC ka Mylliem, u bah Ronnie V Lyngdoh ba ka don ne em ka ain ban tehlakam ia ki syiem, ki myntri ban iashim bynta ha ka sain pyrthei.

                “Ka kyndon 12 Appointment and Succession of Chiefs and Headmen Act 1959 ka la kren ba ka la mana ia ki nongsynshar ban iashim bynta ha ka kam sain pyrthei lait noh 19 tylli ki Hima kiba la don la kajong ka ain kaban shong ha ka kyndon ba ki la shna ban ai lad ne em ia ki nongsynshar ban iadon bynta ha ka politik”, la ong u bah Pyniaid.        

                U bah Pyniaid u la ong ba ka Executive Committee kan sa bishar ia kane ka kam halor ka jingkynnoh donkti ia ki myntri bad u syiem ka Hima Mylliem.

                Haba wanrah ia kane ka jingkylli, u MDC ka Mylliem ula kynnoh hapoh ka ing dorbar ba u syiem, bad ki myntri ka Hima Mylliem ki donkti ban ialap elekshon bad ban sam pisa na ka bynta ki kyrtong pyrshah ia u ha kane ka elekshon MDC ba dang shu dep.
U Bah Ronnie ula wanrah ia kane ka mat da kaba buh jingkylli hapoh ka ing dorbar ka dorbar mang tyngka ka Khasi Hills Autonomous District Council (KHADC).
U MDC ka Mylliem u la kam ruh ba ki myntri bad u syiem kila maham ruh ia ki katto katne ki Rangbah shnong ba lada kim kyrshan ia ki kyrtong jongki, kin sa leh da ki kam.
Na ka liang u bah Ronnie ula dawa ba ka Council ka dei ban shim kam ia kine kiba donkti ban iakyrsum politik. 

                “Ngi la don ki jingtip kiba thikna halor kane bad nga kyntu ia ka Executive Committee ban leh eiei”, la ong u bah Ronnie, da kaba bynrap, “ka jingiadon kti ki myntri, ki syiem kan ktah ia ka synshar khadar kaba khuid.

                U la ong ba ki paidbah ki dei ban ioh ban jied laitluid iano iano ha ka elekshon khlem kano kano ka jingshah pyntieng ne shah thied ha ka bor jong ka pisa.