Ha ki ar jaka, la pynlong ia ka ‘Shad Sajer’ ha Ri Bhoi

Nongpoh: Ha kaba rakhe ia ka ‘Shad Sajer’ ha Ri Bhoi, myn hynnin ka sngi la pynlong ha ki ar-tylli ki jaka bad kata ka long ba ka Raid Nonglyngdoh ka la pynlong ha u Lum ka Law Kyntang jong ka Raid Nonglyngdoh, katba na ka liang ka Hima 12 Lyngdoh Confederation on Sport, Arts & Culture, ka la pynlong ha Madan Pahamsyiem, Nongpoh.
Ha ka jingrakhe kaba la pynlong ha Madan Pahamsyiem, ka Deputy Commissioner ka Ri Bhoi, ka Kong R.M Kurbah, ka la shim ia ka bynta kum ka kongsan, ha ryngkat ka jingdonlang u Sirdar ka Nongpoh Sirdarship Elaka, u Bah Wanphrang Syiem Nongshai, u Paiem barim ka Hima Mylliem, u Paiem Laborius Manik Syiem, u Bah C.B Syiem, Chairman ka Nongpoh Town, u Samla Ferdinald Kharkamni, President ka KSU, North Khasi Hills district lem bad kiwei kiwei.

Katba ha ka Shad Sajer, kaba la pynlong ha Law kyntang ka Raid Nonglyngdoh ha Mawjong, u Bah Plielad Tiewsoh, kum u kongsan bad u Bah Bipul Thangkhiew, President ka RBYF kum u symbud kongsan, ki nongkitkam ka Raid, ki longsan ki mansan lem bad ki khun ki hajar ka Raid.
Bun na kiba ai jingkren ha kane ka sngi, ki pynpaw ia ka jingkmen halor ka jingpynbna Shuti da ka sorkar ha ka sngi ‘Shad Sajer’ ha Ri Bhoi, kaba long ruh kum ka dak jong ka jingburom ia kane ka Shad tynrai, kaba kum ki paidbah ne ki khun ki hajar ki lah ban pynneh pynsah ia la ka riti ka dustur bad ka tynrai kiba la ialam naduh ki longshuwa ki manshuwa.