Ka SSAP kan sloit noh ia ka iktiar jong ki ADC

B Mukhim

Ha ka 24 tarik u kyllalyngkot, 2019 ngi la ioh pule ia ka khubor ba ka Cabinet jong ka sorkar pdeng ka la mynjur ia ka sixth schedule Amendment Bill (SSAB) na ka bynta ban wanrah ki jingkylla ha ka sixth schedule jong ka Riti synshar bad ruh ban pynkylla kyrteng noh ia ka Autonomous District Council (ADC) sha ka Autonomous Territorial Council (ATC). La batai ruh ba kane ka bill kan pynbha, ym tang ia ka jingioh pisa (financial resources) jong ki District Council, hynrei ruh ban pynkupbor shuh shuh ia ki ha ka liang ka synshar khaddar (Administrative powers). Kumba ka long mynta ia kane ka bill ym pat shym la wanrah ha khmat jong ka Parliament ha ka sien shong-dorbar ba la dep na ka bynta ban pynlong ain noh ia ka.

Ka long namarkata, kaba donkam ban iatai ia katei ka bill bad ban phah kino kino ki jingai jingmut sha ka sorkar pdeng shuwa ba kan long ain. Haba ngi bishar bniah ia katei ka bill ngi shem ba ha ka jaka ban pynkupbor shuh shuh ia ka District Council, katei ka bill ka sloit noh pynban ia ka iktiar jong ki:-

1. Ka Constituent Assembly, lyngba ka sixth schedule jong ka Riti synshar, ka la pynkupbor ia ki District Council ban thaw ain halor ka synshar shnong bad ruh ha kaba thung ia ki Rangbah Shnong {Para 3 (v)}. Ka SSAB pat ka batai lypa ba ia ki Dkhot jong ki village bad Municipal Council dei ban jied da u paidbah bad ba shi bynta na ka lai bynta (1/3 rd) na ki dkhot kin dei ki kynthei (ia mynta hi, ka jingjied paidbah ia ki dkhot bad ka jingmang kyrpang ia ki kynthei kan nym pat trei kam ha ka jylla Meghalaya) bad kam don jingmut shuh namarkata, ia ka District ban thaw ia ka Village Administration Bill (VAB).
2. Ka sixth schedule, kumba ka long mynta ka la pynkupbor ia ki District Council ban thaw ain halor ka khyndew ka shyiap, ki khlaw ki btap, ki nur-um (canal) na ka bynta ka rep ka riang bad kumjuh ruh ban thaw ain halor ka rep-shyrti. Ka SSAB pat ka la knieh ia kitei ki kam baroh na ka District Council bad aiti ia ki sha ki village Council bad Municipal Council ban leh.
3. Ha ki snem kiba la leit, lada ka don kano kano ka jingmang pisa na ka Finance Commission jong ka sorkar pdeng, ka pisa ka leit beit sha ki District Council. Katkum ki kyndon jong ka SSAB pat, ka Finance Commission ka dei ban mang pisa ym shuh tang ia ki District Council hynrei ruh ia ki village bad Municipal Council.
4. Ha ka SSAB ka don ka kyndon ha kaba yn thaw ia ka State Finance Commission, ym ia ka District Council Finance Commission. Kane ka mut ba ka jingmang pisa ia ki District Council na ka bynta ki kam pynroi ki dei ban iaid lyngba ka State Commission jong ka sorkar jylla.
5. Ha ka SSAB ka don ruh ka kyndon ha kaba yn thaw ia ka State Election Commission ka ban pynlong ia ki election sha ki District Council, Village Council bad Municipal Council ha ki scheduled Areas jong ki jylla Assam, Mizoram, Tripura bad Meghalaya. (ia mynta hi kane ka kyndon ban pynlong election sha ki village council bad Municipal Election kan nym pat trei kam ha ka jylla Meghalaya).
6. Ka SSAB ka tyrwa ban pynkiew ia ka jingdon jong ki dkhot (MDC) sha ka KHADC na ka 30 sha ka 40, JHADC na ka 30 sha ka 34 ngut bad GHADC na ka 30 sha ka 42 ngut. Katkum ki tyllong khubor, ha ka jingiakren bad u CEM ka JHADC, u Myntri ka sorkar pdeng uba dei khmih ia ka tnad Tribal Affairs, ha Jual Oram, u la ong ba 4 ngut na ki dkhot sha kitei ki Autonomous District Council kin dei ki Nominated Member. Hato ia ki Nominated Member yn thung da ka sorkar jylla? Bad lada ka long kumta, ka lad ka plie ia ka sorkar jylla ban thaw ne ban pynkhyllem ia ki EC jong ki ADC lyngba ki Nominated Member.

Ka jingpynkylla ia ka sixth schedule lane ka sixth schedule Amendment Bill kan ktah ym tang ia ka iktiar jong ka District Council hynrei kan ktah ruh ia ka synshar shnong synshar thaw bad ia ka jinglong trai jong ngi halor ka khyndew ka shyiap, ki khlaw ki btap bad ki mar poh-khyndew.

• Ka dei ka kamram jong ka District Council ban thaw ain halor ka synshar shnong synshar thaw hynrei namar ba ka VAB ba la thaw da ka KHADC hapoh u pud u sam jong ka, kam pat long ain haduh mynta kumta kiba bun ki shnong ki dang bud ia ki riti ki dustur kiba rim. Ka SSAB ruh, kumba ka long, mynta ka dang ai lad ia ki dorbar shnong ha Meghalaya ban bud ia ki dustur rim. Hynrei namar ba ia ka jingmang pisa sha kine ki dorbar shnong (village bad municipal council) yn leh lyngba ka State Finance Commission, kumta ki dorbar shnong kin hap ban kohnguh ia ka hukum jong ka sorkar jylla.
• Ka SSAB ka la knieh noh ia ka bor jong ka District Council halor ka kyndew ka shyiap bad ka la aiti ia ka sha ki dorbar shnong, kumta ka sorkar pdeng bad sorkar jylla kin nym donkam shuh ia ka NOC na ka District Council lada ka kwah ban shim jaka na ka bynta ban shna surok ne leh kino kino ki kam pynroi. Kane namarkata, kan pynlah ruh ia ka sorkar ban pyntrei ia ka surok 2 Lane na Nongstoin sha Mawthabah bad ban tih ia u Uranium khlem da ioh ia ka NOC na ka KHADC.
• SSAB ka long pyrshah ia ka Riti synshar jong ka Ri India namar ba ka la knieh noh ia ka bor jong ki Autonomous District Council bad ka la pyniap noh ia ka nongrim bad ia ka jingthmu jong ka sixth schedule. Ka Constituent Assembly ka sngewthuh ba ki shnong kin nym lah satia ban iada ia ka khyndew ka shyiap bad ia ki khlaw ki btap namar ba kin nym lah ban ialeh pyrshah ia ki bor kiba kham ha khlieh. Nalor kata, ia ki dkhot jong ki dorbar shnong ym shym la jied da u paidbah lyngba ka election ha kaba kynthei bad shynrang ki lah ban iashim bynta. Ka constituent Assembly, namarkata, ka la buh noh da kawei pat ka bor kaba kham ha khlieh bad kata ka bor ka dei ka Autonomous District Council ha kaba ia ka bor bad jingtrei kam jong ka la batai ha ka sixth schedule jong ka Riti synshar.

Ka Supreme ha u bnai Naitung 1997 ka la ai ia kawei ka judgement ba la tip kum ka ‘Samatha Judgement’ kaba la khang pyrshah ia ka sorkar Andhra Pradesh ban aiwai ia ki mar poh-khyndew ha ki schedule area (jaka jong ki Riewlum) sha ki company shimet. Kane ki paragraph harum ka dei kawei na ki paragraph ba la sot na katei ka judgement:-

Para 111 – “The object of the Fifth and sixth schedule as seen earlier, is not only to prevent acquisition, holding or disposal of the land in schedule Areas by the non-tribals or alienation of such land among non-tribals inter-se but also to ensure that the tribals remain in possession and enjoyment of the land in schedule Areas for their economic empowerment, social status and dignity of their person …..” (ka jingthmu jong ka Fifth Schedule kam dei satia tang ban khang lad ia ki non-tribal ban thied jaka ne ban iadie iathied para maki, hynrei ruh ban pynthikna ba ki jaka ha ki schedule area ki dei beit ban long trai da ki tribal khnang ba kin bit kin biang bad kin sngew long iaryngkat para briew …..)

Shuwa ban pynkut, kan bha ban kdew khyndiat ia ka jingkynthoh ba la ai da u Minister I.T Law & Justice jong ka sorkar pdeng, katkum katei ka tyllong khubor, ha kaba u la khot ba ka SSAB ka dei ka ‘game changer’ bad ruh ia ka jingkynthoh jong u Chief Minister, Meghalaya ha kaba u la khot ia ka rai jong ka Cabinet halor ka SSAB ba ka dei ka ‘historic decision’.