Ong ka Synjuk ki Rangbah Kur, ba ki nongkitkam ba ha khmat kim dei ban ialap elekshon

Shillong:Ka Executive Committee jong ka Synjuk Ki Rangbah Kur kaba la long ha ka 16tarik Lber 2019 ka la jied bad mynjur ia ki dkhot ba shipor  jong ki District Committee ha baroh hynnriew tylli ki district ka Bri-U Hynniewtrep khnang ban pyniaid shaphrang ia ka jingtreikam. Ka Executive Committee jong ka Synjuk ka kyntu ruh ia ki Kur baroh ki bym pat thaw ne seng la ki Seng Kur ba kin seng noh khnang ba kan long ka jingiada ia la ka kur ka jait bad ka ri bad jaidbynriew. Ka Executive Committee kan sa leit ban iakynduh ia ki nongsynshar ka jylla bad district council ban ai noh ia ka ka jingmynjur ia ka Clan Administration Bill 2018. Ka Executive Committee jong ka Synjuk ka pynpaw ruh ia ka jingsngewkhia kaba jur ia ka jingjyllei jong ka jingdihbuaid drok bad khaii drok ha kane nongbah Shillong khamtam bun na ki khun samla ki la ngop ha ka ne ka kam sniew. Ha kaba iadei bad kane ka Synjuk kan sa shim ki lynti kumno ban ialeh pyrshah ia ka ne ka jinghiarthma ba jar jar pyrshah ia ka jaidbynriew. Kumta ka Synjuk ka khot bad iawer ia baroh kiba don jingkitkhieh ban iasnoh kti lang ha ka ne ka kam.

Ka Executive Committee ka la rai ruh ba ki nongkitkam ba ha khmat jong ka Synjuk kim dei ban ialap elekshon ha kane ka elekshon MP kaban sa long namar ka Synjuk ka dei ka non-political body. Hynrei ki dkhot jong ka ki long laitluid khlem ka jingshahteh, tangba ym dei ban pyndonkam ia ka kyrteng ka Synjuk Ki Rangbah Kur.