Shillong: Ki lad khubor ba la ioh lum da U Rupang, ki iathuh ba ki arngut ki nong pan tiket MP jong ka seng Congress, ki la phah da ka jingthoh sha U Dr C Lyngdoh, President jong ka seng bad kren diaw mynsiem shibun halor ka jingrai hi jong ka Meghalaya Pradesh Congress Committee (MPCC) ia U ma Vincent Pala ba un iakhun biang kum u kandidet jong ka seng Congress ha kane ka sien ialeh 2019.
Kitei ki arngut ki nongialam, kiba kynthup ia U bah John Kharshiing bad U bah HDR Lyngdoh, ki kynthoh ruh ba ha shwa ban rai ia U Ma Pala, ka Meghalaya Pradesh Election Committee (MPEC), kam shym la pan jingmut ruh na ki nongialam jong ki Block lane ki District, ki MLA,MDC bad la ong shuh shuh ba ha ka jingialang jong ka MPEC, la ailad ruh ia kiba pan tiket, ba kin ia shong jingialang bad katei ka wan rah ia ka jingbym shai bad ka jingbym beit shuh jong ka jingialang.
La ong shuh shuh ba ka MPEC, kam shym la iakren eiei ruh em halor ka result jong ka elekshon MDC kaba dang shu dep, ha kaba na ki 29ngut ki dkhot sha Khasi District Council, ka Congress, ka jop tang 10ngut bad ha Jaintia Hills, ka jop tang 4ngut na ki 19ngut ki kandidet ba ka pynialeh katei ka seng.
La ong shuh shuh ba ha ka elekshon MDC ba dang shu dep, ha Khasi bad Jaintia Hills, U MP, um shym la leit satia ban kanbas ha baroh ki Constituency ba long elekshon, wat la katei ka elekshon, ka long kaba ia snoh bad ka elekshon Lok Sabbha, ka ban sa long shen.
Kitei ki arngut ki dawa ia ka MPEC, ba kan khot biang sa shisien ia ka jingialang lane ban thaw noh da ka komiti thymmai, khnang ban pyrkhat bad ban iakren ia ka elekshon Lok Sabbha ka ban sa long shen.
Phi don ban ong eiei?