Shillong: Ka Meghalaya kam pat don u pud u sam uba biang naduh ba la ioh ia ka jylla bad kam shym la lah ruh ban pyni ia u pud u sam, katkum ba la paw ba ha ka jingtip da ka Right To Information (RTI) ba la pan da u bah DK Iawphniaw.
Haba kren sha ki nongthoh khubor myn hynnin ka sngi, u bah Iawphniaw u la ong ba u la pan jingtip da ka RTI ia u pud u sam ka jylla hynrei ka tnad Revenue ka jylla, kam lah satia ban ai.
U la ong ba katkum ka jingtip RTI, ka sorkar kam shym la lah ban ai ia ka jingtip kaba bniah halor ka jingheh u pud u sam ha ka por ba phiah ia ka Meghalaya na ka Assam bad kane ka paw katkum ki kot ki sla kiba la ioh na ka sorkar Meghalaya bad kumjuh na ki District Council.
U bah Iawphniaw u la ong ba ka sorkar kam lah ruh ban ai ki jaka ba la shah skud ha ka Assam naduh ba la thaw ia ka Meghalaya.
U la ong ba naduh ka snem 1972, ka la don 20 sien ka jingiakynduh ki myntri rangbah, hynniew sien ka jingiakynduh ki Chief Secretary ka Meghalaya bad ka Assam.
“Ki politishian ki la ia pyrta ia u pud u sam ha ka por hynrei tang hadien ba la kut ka elekshon ki la jah lang”, la ong u bah Iawphniaw.
Phi don ban ong eiei?