Shillong: Ka kashari ba ha khlieh tam ka ri, ka Supreme Court ka la pdiang ia ka jingujor Public Litigation Interest (PIL) u bah THS Boney, Khun Hynñiewtrep National Awakening Movement (KHNAM) ban tuklar halor ka jingïakajia pud hapdeng ka Jylla Meghalaya bad ka Jylla Asam mynta la jan 47 snem kynthih.
U bah Adelbert Nongrum (ar sha ka mon) lem bad U bah THS Boney haba kren sha ki kotkhubor ha ka Sngi Saitjain:Rupang
Ia kane ka mukotduma, la buh sngi ka kashari ban shim bishar ha ka 26 tarik u Iaiong ban wan.
Ha ka jingkren sha ki lad pathai khubor ha kane ka sngi Saitjain, u bah THS Boney u la ong ba shwa ba un leit tied jingkhang sha ka kashari, u la dep phah jingthoh sha u myntri ka tnad kam pohiing u Rajnath Singh naduh u Risaw ba la dep hynrei kam don satia kano kano ka jingjubab halor kane.
“Nga la phah jingthoh sha u myntri ka tnat kam pohiing ka ri u Rajnath Singh ha ka 15 tarik Risaw 2018 ban kyrpad ba un tuklar ban pynbeit ia u pud u sam hapdeng ka Meghalaya bad ka Assam hynrei ngam ioh jubab eiei bad hadien kane, nga la wad ia ki kot halor kane ka kam bad nga la rai ban kiew noh sha ka Supreme Court”, u la ong.
U la ong ba u la wad ia ki kot ki sla katba lah ban pynbiang kiba iadei bad kane ka kam, khnang ba ka mukotduma kan nym shah rem ha ka jingiakhun.
Ka Iingbishar ka la pdiang ïa ka mukotduma ha ka 14 tarik mynta u bnai, la iathuh u Bah Boney.
U la ong ba ka dei ka kamram jong ka Sorkar India ban pynbeit ïa u pud u sam hapdeng ki jylla. U la ai nuksa ia ka mukotduma hapdeng ka Karnataka bad ka Jylla Andhra Pradesh ha ka mukotduma jong ka Obalupuram Mining Company bad dei kane ka rai ba la pynmih da ka Supreme Court kaba la plie lynti ia u ban ïaid shakhmat.
U President ka KHNAM, u Bah Adelbert Nongrum ula bynrap u la ong ba naduh ba la thaw ïa ka Chandrachud Commission ka jingïapynbeit pud kam shym la poi shaei shaei ruh bad wat ki jingïakren hadpdeng ki Myntri Rangbah bad ka jingïasoi ïa ka Status Quo ruh kam shym la don jingmut eiei.
Phi don ban ong eiei?