Rah ka Lawmali ia ka phutbol ki shipai Assam Rifle

Shillong: Ka Lawmali ka la pynliem ia ki shipai Assam Rifle bad rah syndon ia ka nam lahduh ka 4th Assam Rifles Invitational Football Tournament ha ka jingiaknieh ia ka nam lahduh kaba long ha kane ka sngi Satjain ha madan JN Stadium, Shillong. Ka Lawmali ka la pynliem ia ka Assam Rifles da 2-1.

Ha ka jingiakhun, u nongialehkai ka Assam Rifle u Lalboi Kipjen u la thep ia ka kol ba nyngkong ha ka 29 minit hynrei ka Lawmali ka la pynphai kylla mar ia sdang ka kyllastep. Ka Lawmali la rah ruh ia ka khusnam T. 1 lak katba ki shipai ki rah T. 50,000.

 Ia ka khusnam bad takma sha ka lahduh la sam da u Lat ka jylla u Tathagata Roy  ba la don lang u Director General of Assam Rifles u Lt Gen Sukhdeep Sangwan.

   Ha ka jingiakhun, u nongialehkai ka Lawmali, u Will Marbaniang u la pyniakhaid ha ka  50 minit bad sa kawei la thep da u Damehun Syih ban long syndon ka kol ka jingjop ha kane ka jingialehkai.

U nongapkol ka Lawmali u Eric Nongkhlaw u la ioh ia ka khusnam kum u nongap kol ba tbit tam ha kane ka jingialehkai.

                U Lt Gen Sangwan u la iaroh ia ki paidbah kiba la wan ban sakhi ia kane ka jingialehkai ha kaba ka la wanrah ka jingshong shit.

                 Haba kren hadien ba la peit ia ka jingialehkai, u Lat u la ong ba u sngew kmen ban shah khot sngewbha ban ioh sakhi ia kane ka jingialehkai, bad u la pynkynmaw ia ka jingiadei jong u bad kane ka nongbah ha ki por ba myshwa, kaba dei ka iing jong ki nongialehkai phutbol ha ka ri.

                U Lat u la ai khublei ia kiba la poi sha ka phainal ha kane ka jingialehkai jong ka Assam Rifles.

Ha kane ka jingiakhun, ki don 16 tylli ki kynhun kiba iashim bynta ba la pynlong da ka Assam Rifles ryngkat ka jingiatrei bad ka Meghalaya Football Association.