Shillong: U Bah Daniel Stone L Nonglait, u nongiasaid ain ka Supreme Court, uba la don ha ka Empaneled Lawyer ka dong mihngi, u la ujor sha ki pulit pyrshah ia uwei u briew, uba la kam ialade kum u Khasi da kaba leh mynleh nongkhrong ha nongbah Delhi.
U bah Daniel Stone L Nonglait, haba kren sha ki kotkhubor ha ka Sngi Thohdieng.
Haba kren ia kane myn hynnin ka sngi sha ki lad pathai khubor, u bah Daniel u la ong ba une u briew u bym dei satia u Khasi, u la kam ialade kum u Panbor Simon Kharkongor u la iakynduh ia u bah Kolanstar Syngkong u pulit Meghalaya ba trei ha Delhi ha ka 30 tarik Naiwieng 2018 bad u la pan pisa da kaba kren Khasi da kaba kam ba u la wan sha Delhi hynrei um lap lynti shuh.
U nongkhrong, uba khot kyrteng ialade Panbor Simon Kharkongor
“Ha ka 1 tarik Nohprah 2018, nga la ioh pdiang ia ka phun na ki paidbah kiba kylli shaphang une u briew hadien ba ki la iohi ha social media (Facebook) bad nga la leit wad jingtip na Meghalaya House ha Delhi bad ki la iathuh ba une u briew u la wan mih sha katei ka jaka ha u snem 2016 bad u la kam ba u dei na Mawryngkneng”, la ong u bah Daniel Stone.
Hynrei hadien ba la wad jingtip bniah, la shem ba ym don ba ithuh satia ia u na ka dorbar shnong Laitumkhrah bad kumjuh na Mawryngkneng. Halor kane, u bah Daniel u la ujor ejahar syndon ha ka 4 tarik Nohprah 2018 kawei ha Mawryngkneng bad kawei ha Laitumkhrah Police station.
Na ka liang u bah Daniel u la kyrpad ia ka bor jong ka ain, ban kem ia une u briew uba la phet rieh mynta, da kaba pynshitom ia u katkum ka ain, namar ka jingpyrshang ban thok bad ban kam leh mynleh ialade.
Phi don ban ong eiei?