Kam don kum kata, kyntait U Ma Shibun ba bun kiba kwah ia U Bah Hek

Shillong:”Kam don kum kata” ong U Ma Shibun Lyngdoh, President ka seng BJP na Meghalaya, haba u nongthoh u kylli, la ka dei ne em, ba ki nongialam jong ka seng BJP, ki kwah ba U Bah AL Hek, un iakhun ia ka elekshon MP na Shillong Lok Sabbha Constituency.
“Ka shong ha ki nongialam jong ka Central Election Committee iano ban ai tiket” ong biang U Ma Shibun. “16tarik, kin shong” la ong biang utei u nongialam ka seng BJP.
Haba kylli, la un leit ne em ban don lang sha ka jingialang jong katei ka elekshon komiti, U Ma Shibun ula ong “Lada nga don ne ngam don, kam dei ka hok jongnga ban mushlia”.
Ha kajuh ka por, u iathuh shuh ba ki 6,7 ngut ki kyrteng kiba la phah na ka seng na Shillong bad kitei ki kynthup ia ka kyrteng jong U Ma Shibun Lyngdoh, uba dei u kandidet ba la ialeh teng ha u snem 2019 bad nangta ula ong shuh shuh ba ki kyrteng jong ki arngut ki MLA, U bah AL Hek bad U Bah Sanbor Shullai ruh ki don lang. Ula ong shuh “Ia ki kyrteng kin jied na kitei, lane ki lah ban jied da kiwei ruh, namar ki seng heh te ki long kumta hi” ong U Ma Shibun, da kaba ai nuksa ia kaei kaba la leh da ka seng Congress, ha kaba ka jied ia U Mukul Sangma, uba khlem applai tiket, ba un iakhun na Tura bad ia U Ma Vincent ba un iakhun na Shillong.
La iathuh shuh shuh da U Ma Shibun, ba ia ki kyrteng jong ki kandidet na Shillong bad Tura, yn pynbna noh ha ka 16tarik mynta u bnai hi bad ula ong biang “Na ka Jylla, ngim don ia ka hok ban ai jingmut ia ka kyrteng jongno jongno ruh” bad u kren shai ruh ba na ka liang jong ka seng, ka la pynkhreh lypa, ba kan trei shakhmat, na ka bynta uno uno u kandidet, uba ka seng na Delhi kan jied.
Ha kawei pat ka khubor, U bah AL Hek, ula pynsngew sha ki lad pathai khubor, ba kiba bun na ki nongialam jong ka seng BJP, ki kwah ba un ia khun ma u, kum u kandidet na bynta ka Shillong Seat.
“Ngam pat rai satia bad ngam shym la applai tiket hi ruh bad nga dang ap ia ka rai jong ka High Command halor kane ka mat” ong U bah Hek.
Na bynta ka Tura, la iathuh da U Bah Hek, ba ki la phah ia saw ngut ki kyrteng sha ka High Command.
Kiwei pat ki lad khubor ki iathuh ba ka NPP, kan pynbna lashai ka sngi ia ka kyrtong jongka, ha kaba la sngewthuh ba kan dei ka Agatha K Sangma, kaba la long teng mynshwa ka MP sha ka dorbar Lok Sabbha.