Shillong: Ka Lawmali ka la pynliem ia ka lahduh mynshem snem ka Smit ha ka jingiakhun ia ka semi phainal ka lumpung 4th Assam Rifles Invitational Football Tournament kaba long mynta ka sngi ha madan Laitkot. Ka la pynliem da 4-1 da ka jingiashut bol.
Kane ka dei ka sien ba nyngkong ba ka Smit kan nym lah shuh ban poi sha ka semi phainal ha kane ka lumpung. Ka Smit ka la rah phainal ha u snem 2016 bad 2018 hynrei ka shah rem ha ka phainal ha 2017.
Ha kane ka sngi Saitjain, ka Lawmali kan iakynduh ia ka Assam Rifles ban iaknieh ia ka nam lahduh. Ka kynhun ki shipai ka Assam Rifle ka la pynliem ia ka Mawpat.
Ia ka Lawmali la thep da u Will Marbaniang ha ka 9 minit hynrei ka Smit ka la pyniakhaid ha ka 76 minit lyngba u Banshan Nongdhar.
Namar ba ki iakhaid, la pynlong ia ka jingiashut penalty ban rai ia ka jop ka rem bad dei hangne ba ka Lawmali ka la pynrung 4-1 ban pynliem ia ka Smit bad rung syndon sha ka phainal.
Ha ka jingiakhun semi phainal kaba ar, ka Mawpat ka la shah pynliem ha ka kynhun Assam Rifles ha kaba ka la ioh ban thep ha ka 37 minit da u T Nang Kuki bad u H Haokip hashwa ban wai ka kyllastep.
Kawei pat ka kol la thep da u Lalboi Kipjen ha ka 50 minit da ka penalty bad sa kawei ha ka 60 minit. katba u M Chetry u la thep ar kol ha ka 80′ bad 84 minit.
Ia kawei ka kol ka Mawpat la thep ha ka 89 minit da u Batiplang Bamon.
Ka jingiaknieh ia ka nam lahduh kan long ha ka sngi Saitjain hapdeng ka Lawmali bad ka Assam Rifles ha madan JN Stadium por Polo.
Phi don ban ong eiei?