Ka MDA ka wan ban pynim ia ka jylla na ka jingma, ong u Conrad: “T.570klur shah ram ka NEEPCO, ka sorkar barim kam siew eiei”

Shillong: U Myntri Rangbah ka jylla u Conrad K Sangma u la ong ba kane ka sorkar thymmai ka la pynlait im ia ka jylla na ka jingma namar ka jingleh phlan duman ka sorkar barim ba ialam da ka Comgress.
Haba jubab hapoh ka iing dorbar, halor ka jingkren u Lat ka jylla mynta ka sngi, u Conrad u la ong ba ka jingjia ka long kumba jan hap ka eroplein ha kaba ka la nang hiar ar sut sha khyndew hynrei ha kata ka por, ka la wan kyndit u pilot ban pynlait ia kane ka eroplein na ka jingma bad ka la lah ban iaid kumba ka dei.
“Kane kam dei ban iania iaka sorkar kaba rim hynrei ban pynbeit ia ki jingbakla”, la ong u Conrad.
U la ong ba ka sorkar barim ka khlem pynlait ia ka baibam tymmen kaba naduh u snem 2017 hynrei kane ka sorkar ka la pynkhuid ia kata.
“Ka sorkar barim kam shym la lah ban ai ka baibam tymmen naduh 2017-18 bad ngi la siew ia ki ha ka jinglut ka kaba T.114 klur”, u la ong.
U la ong ruh ba ka sorkar MDA ka la lah ban siew ia ka bai rneng jong ki Asha kaba la shu leh bein ka sorkar barim.
“Ka sorkar barim ka khlem pynlait haduh saw snem ia ka rneng ki ASHA bad kane ka sorkar ka la lah ban pynkhuid ia kane ka jingai rneng ia ki Asha bad ngi la lah ban pynlait T.20 klur”, u la ong u myntri rangbah.
U la ong ba ka sorkar barim ka la wanrah ia ka jingiadei kaba sniew bha hapdeng ka sorkar bad ka NEEPCO bad dei hadien ba la wan kane ka sorkar thymmai ba la wanrah biang ia ka jingiajan bad kane ka kompeni ka sorkar pdeng kaba dei ka nongsam ding ia ka jylla.
“T. 570 klur sah ram ha NEEPCO ha kaba ka sorkar barim kam shym la siew eiei haduh mynta bad dei ha kane ka sorkar ba la lah ban siew hadien ba la iakren bad ka NEEPCO, ngin don ka jingiatreilang bad ka NEEPCO”, u la ong.
U Myntri Rangbah u la ong ba kane ka sorkar ka la pynthymmai ruh ia ka jingtreikam ka MCCL kaba iakynduh ia ki jingeh bun snem. “Ka sorkar ka la leh da ki kam ban pynthymmai ia kane ka karkhana sorkar ym tang ban pynlait ia ka pisa”, u la ong.
U Myntri Rangbah u la niew bun ki kam ba kane ka sorkar thymmai ka la leh ha kaba ka sorkar barim ka la ialam ia ka jylla ha ka jingngam lada kan dang bteng haduh mynta.