Ka Synduk Jingkhuslai (The Worry Box)

Josper S Dura,Nongshken, EKH

 

Nga la iohsngew shaphang kawei ka longkmie kaba ju mlien ban buh ia ka synduk ha Iing shetja jong ka.Ka jer kyrteng ia kata ka synduk “Ka Synduk jingkhuslai” (the worry box).Lada don kaei kaei kaba pynjynjar ia ka, ka thoh ha I lyngkhot kot sada bad thep ia ka hapoh kata ka synduk.Ka la rai ha lade ba kan ym pyrkhat eiei shuh shaphang kine ki jingeh namar ki la don hapoh ka synduk. Bun bun sien ka ju plie iaka bad sei ia kita ki lyngkhot kot sada, bad peit biang ia kita ki jingeh ba la thoh ha ki.Da kaba bud ia kane ka rukom, kata ka longkmie ka la lah ban klet lut phar ia kita ki jingeh.Ka tip ba yn sa peit pat ia ki hadien.Te namar ba ym shym la lynshop iaka da ka jingkhuslai halor kita ki jingeh jong ka, ka long jai jai beit bad ka kham lah bha ban shem iaki lad ki lynti kumno ban weng iaki jingeh jong ka.Bun bun sien ka shem da kaba kmen ba bun na ki jingshitom bad ki jingjynjar kiba la ju pynkhuslai iaka ki jah la ka jah hi.
Kaba thoh ia ki jingkhuslai jong phi halor ka kot sada bad kaba thep iaki hapoh synduk ki lah ban ai jingiarap iaphi, hynrei haduh katno kan long kaba kham bha ban buh iaki ha ki kti jong U Blei bad klet noh shaphang jong ki.Ka jingkhuslai ka lute na ngi ia ka jingkmen jong ngi, ka kjit khoit ia ka bor jong ngi bad ka tan shadien ia ka jingsan ba kynja mynsiem jong ngi bad kaba sniew tam na baroh ka pynjah burom ia U Blei.Ngi la ju iohi hangne hangtai iaki briew kiba la kylla sniew khlieh noh tang namar iwei I jingkhuslai iba rit eh.U Jisu u ong: “Namarkata wat khuslai na ka bynta kaba lashai, naba kata kaba lashai kan khuslai na ka bynta la ka jong.Ia ka sngi ka biang la ka jong kaba sniew”(Mt,.6:34)Ong ki riewstad “Thep ia ki jingkhuslai jong phi baroh ha ka bank jong ka lashai“.
Kumta, to ngin ailad ha u Trai,ngeit ia ki kular jong u, bad shaniah ha u uba lah ban pynbiang pyndap lut iaki jingdonkam jong ngi.Kum ki Khristan ngi lah ban buh iaki jingeh jong ngi ha ki kti jong u.Bad kata ka long kaba kham bha ban ia kaba thep ia ki ha ka synduk jingkhuslai.Haba ngi la buh bad aiti ia la ki jingeh ha ki kti jong U Blei, u thep ia ka jingsuk jong U hapoh ki dohnud jong ngi.Sngap kumno u nongrwai shem mynsiem u rwai:

Ha sngewsih bad ha khuslai,
Jingtngen ianga u ai;
Ha u nga bret ka shitom baroh phar,
U tiew li li jong pynthor ,
U Khlur step baphyrnai;
Uba bha briew tam na ki shiphew hajar.