Ba shah shoh beiñ ki khynnah Khasi, byrngem ka HYC ia u nonghikai

Shillong: Myn hynnin ka sngi ka HYC Mawlai Circle ka la leit byrngem ia uwei u nonghikai jong ka skul KV, kaba don hapoh ka skulbah NEHU na ka daw ka jingshoh beiñ jong u ia ki khynnah Khasi kiba pule ha katei ka skul. Utei u nonghikai u dei uba la tip kyrteng kum u Sir Manjeet bad u dei na ka jylla Haryana.
U President ka HYC Mawlai Circle u bah Donboklang Kharlyngdoh, u la ong ba la pyntip sha katei ka seng ba utei u nonghikai u ju shoh bein ia ki khynnah Khasi katba ia kiwei pat ki bym dei Khasi um ju shoh. U la ong ruh ba ha ka por eksamin utei u nonghikai u ju knieh ia ka jingthoh jong ki khynnah Khasi tang mar ia tied bell katba ia kiwei pat u ailad ba kin thoh pyndep.
Katei ka seng mynta ka sngi ka la leit ia kynduh ia u Principal katei ka skul u L.P Shah bad ka la byrngem ruh ia utei u nonghikai hakhmat u Principal ryngkat ka jingmaham. U bah Donbok u la iathuh ba u Principal katei ka skul u la jubab ba um tip eiei, naba u dang shu wan naba shim shuti bad u la kular ban phah tohkit ia katei ka jingjia bad u la ong ba lada u lap ba ka long kaba shisha un ym map satia ia utei u nonghikai uba wanrah ia ka jingpyniapher jaitbynriew.