Ka jingioh Vote ki kyrtong MP 2014 na Shillong bad Tura bad ki Party ha ka elekshon MLA 2018

Shillong: Shibnai shuwa ba ka elekshon MP kan long, ngin ia phai khyndiat sha ka jingioh vote jong ki kyrtong kiba la ia khun ia ka elekshon MP Lok Sabha 2014 na Shillong bad Tura konstitwensi. Ha Shillong konstitwensi u Ma Vincent H Pala ka seng Congress uba la jop ha katei ka elekshon u ioh 2,09,340 Vote bad u kyrtong shimet uba wan ba-ar u Pastor PBM Basaiawmoit u ioh 1,68,961 Vote, u bah Paul Lyngdoh ka UDP u wan balai u ioh 1,06,817 Vote, u bah Shibun Lyngdoh ka BJP u ioh 97,979 Vote. U kyrtong ka AAP u bah Armerington Kharshiing u ioh 8815 vote, u kyrtong ka CPI u bah Richard D Shabong u ioh 7418 Vote, ka kyrtong shimet ka kong Ivoryna Shylla ka ioh 6605 Vote bad u bah Denis Siangshai u ioh 5092 Vote , u NOTA u ioh 10960 Vote.
Ha tura konstitwensi pat u Purno A Sangma ka NPP u la jop ha katei ka elekshon MP Lok Sabha 2014 pyrshah ia u kyrtong ka Congress u Daryll Ch Momin. U Purno u la ioh 2,39,239 Vote bad u Daryll pat 1,99,858 Vote. Ha ka elekshon shiteng samoi pat hadien ka jingkhlad noh u Purno u Conrad K Sangma u la ia khun pyrshah ia ka lok u Dr.Mukul Sangma ka Dikkanchi D Shira, u Conrad u la ioh 3,29,497 Vote katba ka Dikkanchi ka ioh 1,37,285 Vote.
Haba phai pat sha ka elekshon MLA 2018 ha baroh kawei ka Meghalaya ka seng Congress kaba don mynta ha ka liang pyrshah ka la jop 21 ngut ki MLA, ka NPP 19, UDP 6, ki kyrtong shimet 3, BJP 2, HSPDP 2, PDF 4, NCP 1, KHNAM 1. Haba ia khein ia baroh ki vote ba ki Party ki ioh ka Congress ka ioh baroh 4,47,472 Vote na Khasi-Jaintia bad na ri Lum Garo, ka NPP ka ioh 3,23,500, ka UDP 1,82,491, ka vote ki kyrtong shimet pat ka don 1,70,249 vote, ka BJP ka don 1,51,217 Vote, ka PDF ka don 1,28,413 Vote, ka HSPDP 84,011 Vote, ka NCP ka don 25247 Vote, ka GNC 21679 Vote, ka KHNAM ka don 14,164 Vote, ka AITC 5544 vote , u NOTA u ioh 14,631 Vote ha baroh khoit ki konstitwensi.