Jrong thylliej u Faleiro ia u Bah Pala: BJP

Shillong, 4 Iaiong:
Ka BJP ha kane ka jylla ka la ther kylla ia ka jingkam jong u general secretary ka AICC ba peit ia ka Meghalaya u Luzin ho Faleiro ba u Bah Vincent H Pala u dei u MP ba tbit uba wanrah ia bun ki kam pynroi ha ka jylla.
Ka jingkam jong u Faleiro ka dei kaba shu jrong thylliej bad kaba sngew lyngngoh ba u put turoi ia u Bah Pala. Ka jingshisha ka long ba ki paidbah ka jylla Megha laya bad ki nongthep vote ka Shillong Parliamentary constituency ki tip kham bha u leh aiu u MP ka Congress”, la ong u general secretary ka BJP Meghalaya u Dipayan Chakraborty.
Ka BJP ka la ong ba ki paidbah ki la tip u Bah Pala u leh aiu kum u myntri sorkar bad ka jingkyrpad jong u Faleiro ia ki paidbah ban jied biang ia u, ka dei ka jingkren lamler.
U la ong ba ka surok Four Lane na Guwahati-Shillong ka dei ka jingleh ka sorkar NDA ba ialam ka BJP kaba pynmih ia ka plan ban don ki surok heh ha ka ri baroh kawei ha kaba ka Guwahati-Shillong Four Lane ka dei kawei ka thup ka sorkar BJP.
“U Faleiro u leh klet ban batai balei ia ka surok Guwahati-Shillong ka sah teng la shiphew snem ha ka por ba synshar ka sorkar UPA”, la ong u Chakraborty.
Ka BJP ka la ong ba ka jingkren jong u Faleiro baka BJP ka wanrah ban pyntreikam ha ka rid a ka jinglong na Gujarat, ka

dei tang ka jingmut sniew kulmar u Falleiro kaba pyni ruh kumno ka party kaba u don.
“Nga kwah ban tip balei u general secretary ka AICC um lah ban kren ia ka jingleh ka Congress kaba pyniap bein haduh 4000 ngut ki Sikh ha u snem 1984, bad u Rajiv Gandhi u la khang lad ban iakren hapoh iing dorbar.