Shillong: U Chief Electoral Officer ka jylla u bah Federick Kharkongor ha ka jingiakren bad ki nongthohkhubor mynta ka sngi u la ong ba ki kyndon elekshon kin treikam mardor noh bad lashai ka sngi yn pyntip sha baroh 11 ngut ki Deputy Commissioner ba kin peit ba kan ym don ka jingpynkheiñ ia ki kyndon elekshon. U la ong ba kan ym don jingktah satia ia ka dorbar mang tyngka kaba dang iaid mynta hynrei u la ong ba ka sorkar kan ym lah pat ban pynbna ia kino kino ki skhim.
U CEO u la ong ruh ba ka sngi thep kyrteng jong ki kyrtong kan long naduh ka 18 tarik u lber bad kan kut haduh ka 25 tarik bad ka jingpeit bniah ia ki kot ki sla kan long ha ka 26 tarik u Lber. Ka jingthep vote kan long ha ka 11 tarik u iaiong bad ka sngi niew vote pat kan long ha ka 23 tarik u jymmang.Ki nongthep vote baroh na ka bynta ka Shillong bad Tura konstitwensi ki don 18,92,616 ngut kaba la kiew 3 lak tam na u 2014 kata 15,65,820 ngut. U la ong ba ha kane ka elekshon yn pyndonkam ia ki EVM bad VVPAT.
Na ka bynta ka jingiaid beit iaid ryntih jong ka elekshon ka tnad elekshon kan khot jingialang lashai ka sngi ia baroh ki seng saiñpyrthei ban ia kren sani bha bad kan pan bor pahara shuh na ka sorkar pdeng ban peit ba kan ym don ka jingpynthud ia ka elekshon. Ki kyrtong kiba ia khun ia ka elekshon ki lah ban pynlut pisa tang hapoh ka T.70 lak tyngka. Ha kajuh ka por u CEO u la pynbna ruh ba ka elekshon shiteng samoi ha Selsella konstitwensi ruh kan long ha katei kajuh ka sngi, yn pynlong ia ka elekshon shiteng samoi ha Selsella konstitwensi hadien ka jingsah thylli katei ka konstitwensi namar ka jingkhlad noh jong u MLA ba la shah jied ha ka elekshon 2018 u Clement Marak.
Phi don ban ong eiei?