Khyllem ka Polling Station ha WGH

Shillong,4 Iaiong:
U lapbah uba jur ryngkat ki jingkhyllem maw ka la jia ha ka miet sngi palei ha ki shnong bapher bapher kiba hap hapoh ka Betasing Block, West Garo hills. Katei ka jingjur slap bad ka jingkhylem maw ka la pynjulor ia bunbah ki ing ki sem bad ki jingthung jingtep ha kitei ki shnong. La iathuh ba ki shnong kiba la shah pynjulor bun ki long ka Dorambokgre, Jewilgre bad ka Bolgamgre, bad bun ki ing ruh ki la khyllem ha kitei ki shnong. La iathuh ruh ba kumba 90 na ka shispah, ki tin soping jong ki paidbah ha katei ka shnong ki la julor lut, napdeng kitei ki ing kiba la julor la iathuh ruh ba ka ing skul ba la thmu ban pyndonkam kum hka jaka thep vote ne ka Polling Station ha Dorambokgre ka la julor.
U Block Development Officer, ka Betasing, u AG Momin, hadien ba u la ioh jngtip ia katei ka jingjia u la hiar sha kitei ki jaka bad u la hukum ia ki Gram Sevaks ba kin leit sha ki shnong bapher bapher ban jurip ia ki jingjulor na bynta ban ai ki lad jingiarap. Kham hadien ha ka por janmiet, u Deputy Commissioner, u Mr. Ram Singh u la leit jngoh sha kitei ki shnong ban jurip ia ki jingjulor.