Shillong:U Pastor PBM, ula pynpaw ia ka jingsngew lynga bad sngew lyngngoh, namar ba ka slem palat ka sniew vote, kaba long haduh ka 23tarik Jymmang 2019. “Hapdeng kine ki 42/43 sngi ap result, yn lut ka buh nongpahara ia ki EVM ha kaba u paid nongthep vote, un ym don por ban syntiat bad ia u, yn ym shah ban tuklar ei ei bad hap shaniah tylli ha ki nongpahara bad nongpyniaid ia ka ilekshon”.
Ka kyrwoh na U Pastor, ka ong kumne harum –
“Dang pynbna u Chief Election Commissioner ia ki sngi thep vote na ka bynta ka ilekshon Lok Sabha kaba nga ngeit ki lad pathai khubor, ki lah ioh ka jingtip kaba bniah.
Sngewtynnad ba naduh mynta ka sngi 10 tarik U Lber, 2019, ka Model Code of Conduct ka la trei kam.
Kaba sngew lyng-a bad lyngngoh ka dei ka jingslem palat ka sngi niew vote – 23 tarik U Jymmang, 2019 na ka sngi thep vote hangne ha Meghalaya bad 89 tylli de kiwei ki Constituency – 11 Iaiong, 2019 katba ha Punjab bad kiwei, yn thep vote ha ka 19 tarik U Jymmang, tang saw sngi shwa ka sngi niew vote katba ka jingap hangne, kan long haduh shi bnai, 12 sngi.
Hapdeng kine ki 42/43 sngi ap result, yn lut ka buh nongpahara ia ki EVM ha kaba u paid nongthep vote, un ym don por ban syntiat bad ia u, yn ym shah ban tuklar ei ei bad hap shaniah tylli ha ki nongpahara bad nongpyniaid ia ka ilekshon.
Ka jingbuh haduh 7 sien – seven phases – ia ki sngi thep vote, ka pyni ba ia u paid nongthep vote, dang duna ka jingshisha wat la ngi ong ba ka Ri Synshar Paidbah – democracy – bad ngi iohi ba ka nang jur kata ka trust deficit ia uba phah nongmihkhmat ban synshar bad thaw Ain na bynta ka bit ka biang, ka bha ka miat, ka suk ka soain ki 1.3 billion ngut ki nongshong shnong ha India.
Nga lah kren ha ka jingiakynduh lang ha ophis ka Election Commission ha Delhi myn ha u Jymmang, 2013, ba balei ym pynlong jingiathep vote ha kajuh ka sngi bad mar ia kut ka por thep vote, sdang niew noh hangto hangto hi lane sha Block Office, SubDivisional Office khnang ban ioh noh ia ka result, ban duna ka jinglut buh nongpahara bad lait na ka suba sniew kaei kaba lah hapdeng ka sngi thep vote bad ka sngi niew vote.
Phewse, ha kane ka kynti, ngi hangne, ngin hap ap haduh 42/43 sngi ban ioh ia ka result.
72 snem duna, la ioh jinglaitluid ka Ri India, hynrei nang ran shadien, nang jur ka jingbymshaniah bad nang jop ka bor peisa ha ki sngi bad taiew khreh thep vote.
Ngi khmih lynti aiu na kane ka ilekshon ?
Sngewbha iathuh bad noh synniang lang.
Phi don ban ong eiei?