Ka Instrument of Accession, dei ka ain Iakjakor, ong ka KSU

Shillong, 3 Iaiong:
Ka Khasi Students’ Union ka rakhe ia ka 4tarik Iaiong 2014, kum ka sngi kaba khraw, ha ka histori jong ka Jaitbynriew, na mar ba ka dei ka sngi ban sah kynmaw, ïa ka jing ïaleh bad jop thma ki shipai ka Bri u Hynñiew trep hapoh ka jingïalam badap shynrang u Syiem Tirot Sing, halor ka nongrim ban ïada ïa ka jingim ba laitluid (freedom) bapura kaba ki nongwei ha kato ka por ki thmu ban knieh jubor ïa ka na kane ka Ri baieid jong ngi.
Ha ka kyrwoh, kaba la pynmih mynta ka sngi, ka KSU, ka ong “Kum kawei na ki jingkyrsiew jong ngi ïa ka jaitbynriew, ngim lah ruh khlem da pynkynmaw ïa la ki para ri shaphang kata ka aiñ ekjakor ba la tip kum ka Instrument of Accession da kaba la pynïasoh jubor ïa ka Ri Hynñiew Trep bad ka India”.
Ka KSU, ka ong shuh shuh, ba ba ka por ka lah ih bha ban ïa thir sani bad janai bha sha phang ka dor (status) jong ka Jaitbynriew hapoh ka ri India, lyngba katei ka aiñ Instrument of Accession, da kaba burom Rangbah ïa ka jubanlak ba la ïa soi ha ka Stand Still Agreement. Ha kaba kut, ka KSU ka da thrang ruh ba ki Para Ri kin buh shuwa ïa ka kam bad ka burom ka Jaitbynriew lajong ha khmat eh. “To ngin pdiang ïa kane ka 4 tarik u Ïaïong Ka Sngi Kyrsiew Ri kum ka sngi ban pyn kynmaw lang ïa ngi baroh ki khun samla ban im kum ki riew shlur ka mynnor na ka bynta ka lawei kaba skhem ki longdien jong ngi”. Ka kyrwoh ka pynkut, da kaba ong “Lah kaba im shi sngi kum U Sing ban ïa kaba im shi junom kum ka langbrot”. [pule ruh sla 3]