Nongstoiñ: Ka kynhun ialehkai jong ka Ryntih SC kala ioh ban khur ia ka nam lahduh ha ka lympung Rani Motor’s Knock out Football Tournamement (RMKOFT) 2018-19 bala pyniaid da ka Laitkseh Sport Club (LSC).
Ka jinglah jong ka Ryntih SC ban khur ia katei ka nam lahduh kadei hadien ba kala lah ban pynliem noh ia ka kynhun ialehkai jong ka Laban SC ha ka jingiakhun phainal kaba la long hynnin ka sngi ha ka madan Mawkynjoin jong ka shnong Laitkseh.
U MLA ka Nongstoin katba u dang aiti ia ka khusnam sha ka Ryntih kaba ioh khur ia ka nam lahduh ha ka lympung RMKOFT ha Laitkseh.
Haba phai sha katei ka jingiakhun phainal kaba la long ha pdeng kitei ki ar tylli ki kynhun ba radbah na sor Shillong kala long shisha ka jingialehkai kaba itynnad haduh katta katta ha kaba ki paidbah na kylleng ka sor bad nongkyndong kila ia tuid sha ka shnong Laitkseh ban wan sakhi ia katei ka jingiakhun phainal.
Na ka liang jong ka Ryntih SC kala ioh ban lam khmat nyngkong lyngba ki ar tylli ki kol ha ka kylla step ia kaba la ioh ban thep da u Arbis Kharkongor ha ka minit kaba 14 bad u Ebormi Buam ha ka minit kaba 39 katba na ka liang jong ka Laban watla kala iakhun tyngeh ban pynphai ia kitei ki kol kam shymla lah satia tad haduh ban da kut noh ka kylla step.
Haba bteng ia ka jingiakhun ha ka kylla miet Kala nang kham itynnad shuh shuh namar ka jingiakhun dohiap jong ka Laban hynrei ka bok kam shymla don satia bad ka Laban ha katei ka sngi bad ha shwa ban wai noh ka jingialehkai ka Ryntih kala ioh ban khyrwit sa ia ka kol kaba lai ha ka minit kaba 90+1 ia kaba la ioh ban thep da u Devinroy Nongspung kaba la pynlong syndon ia ka Ryntih ban ioh ia ka jingjop.
Ia katei ka lympung la wan ban pynhap pyrda da u MLA ka Nongstoiñ u bah Macmillan Byrsat ha ryngkat ka jingiadonlang ruh u sordar ka Shnong Laitkseh u bah H. Thongni, u sordar ka Shnong Upper Laitkseh bah E.K. Kharit, i kong O. Marboh i ba wan na ka Amrit Cement bad kiwei kiwei kiba la sam ruh ia ki khusnam sha ki baroh ar tylli ki team bad ia ki khusnam ba kyrpang.
Ka kynhun ialehkai jong ka Ryntih SC kala ioh ban khur ia ka song pisa kaba T.3 lak ryngkat ka trophy katba ka kynhun kaba wan ba ar pat ka Laban SC kala ioh ia ka song pisa kaba T. 1 lak 20 hajar ha ryngkat ka trophy bad ki khusnam ba kyrpang.
Ha katei ka sngi ki khusnam ba kyrpang kynthup ia ka nam most promising players ha kaba la ioh da u Pynbha Suting na ka Laban SC, man of the match Brolington Warlarpih na ka Ryntih SC, swift players of the match Arbis Kharkohngor na ka Ryntih SC, best Defender Banpynkhrawnam Nongkhlaw na ka Ryntih SC, best goalkepper u Maitshaphrang Kharumniud na ka Ryntih SC, top scorer u Bickyson Kharkohngor na ka Laban SC, best players da u Devinroy Nongspung jong Ryntih SC.
Phi don ban ong eiei?