KIEI KI KAM KIBA HAKHMAT EH JONG KI E.C KHADC & JHADC ?

Ka ilekshon sha ki ar tylli ki District Council Khasi bad Jaintia Hills ka la dep da ka jingiathep-vote ha ka 27 tarik jong u Rymphang bad da ka jingniew ia ki vote ha ka 2 tarik u Lber, 2019. Ka kam thaw sorkar ha ki ar tylli ki District Council ruh ka la dep da kaba iathaw sorkar para party rilum, ka NPP bad ka UDP ha Jaintia Hills, katba ka NPP, UDP, HSPDP, PDF bad ki Independent ha Khasi Hills. Kane ka rukom thaw sorkar ka iaid lang kumba long ha ka sorkar jylla (MDA).

Na ka liang ki nongjied (voters) jong kine ar tylli ki District Council, ki la pyndep hok iala ka kamram ban jied ia baroh 58 ngut ki MDC bad ka jubab ba ki la ai ka long ban bujli ia ki MDC ha kiba bun tylli ki Constituency bad ban jied biang ia ki katto katne ki MDC katkum ka jingibit jong ki. Ha kane ka kynti, ka long kaba itynnat shibun ba kiba bun ki nongjied (voters) ki la kylliang ia ki MDC bad ba ki la jied ruh ia bun ngut ki briew kiba la nang la stad bha, khamtam ha Jaintia Hills. Ngi shaniah bad kyrmen ba kin sa mih ki soh kiba bha bad kiba thiang na ki MDC ba ki paidbah ki la jied.

Nangne shakhmat ki kam jong baroh ar tylli ki Executive Committee (jong ka Jaintia Hills bad jong ka Khasi Hills) ki long kiba bun bad kiba khia bha ruh. Kumba lah ban iohi, hakhmat duh ka kamram jong ki ka long, ban peit bniah ba ki kam ki jam kiba iadei bad ka jingiaid beit iaid ryntih jong ka District Council ha kaba iadei bad ki kam kiba manla la ka sngi (day- to- day administration) bad kiwei kiwei ki kam kiba iadei bad ka synshar khadar katkum ba la pynkhamtam ha ki E.C da ki kyndon treikam jong ka Sixth Schedule. Nangta ka kamram kaba bud ka long ban bud-dien ia ki Bill baroh ba la pass da ki Executive Committee bamynshuwa, kino kiba la dep ioh ia ka jingmynjur jong u Lat bad kino kiba dang sahkut bad u Lat jong ka jylla da kaba leit iakynduh ia u ba un leh kloi ia kaba donkam. Kaba sah nangta ka long bishar sani bha kiei ki kam kiba kyrkieh bad kiba donkam jong ka District Council kiba dei ban leh kloi lan.

 Namarba ki jingpyniaid kam baroh jong ka Council ki donkam peisa, kaba donkam kyrkieh eh ruh ka long ban bishar sani bha ia ka jingdonkam peisa jong ka District Council, namar ban pyndep ia ki ba bun ki kam la donkam ka jingpynlut. Hab ban bat bad teh lakam bha ia u saipan tyngka namar lada pyllait laitlan ioh hap ha ka jingdap ram haduh niuhmat bad lehse, ym lah satia wat tang ban siew tulop ia ki nongtrei. Nangta, hab ban khmih bad bud dien bha ia ki lad pynmih peisa nalor ba hab ban iit ki lad ki lynti kumno ban pynmih peisa shuh shuh na ka bynta ka jingdonkam jong ka Council. Kaba hab ban husiar bad tyngkai bha ka long ban ym don ka jingpynsyrwa kai ia ka tyngka jong ka Council kumba la leh da ki Nongialam barim jong ki Executive Committee. Ym tang ka jingpynsyrwa hynrei ka la don ruh ka jingklop bad bamsap ia ka tyngka jong ka Council ban pynriewspah ialade. Ngi ki paidbah nongjied, ngi angnud hir hir bad da kyrpad jur ba ki E.C kiba mynta, kin kiar raimaw raidieng na kane lehklop, bamklop bad bam sap ha ki Council jong ki. Kan long ka burom bad ka jingiaroh lada kine ki E.C ki lait na kane ka pyut ka pyar kaba bamkruin ia ka longrynieng jong ki District Council. Ka jingangnud jong ki nongjied ruh ka long ba kine ki E.C, naduh ki CEM, ki EM, ki Chairman, ki Deputy Chairman bad kito kiba batkam hapoh ka Council kin ai ka nuksa kaba bha ia ki ki Nongtrei lajong bad ia ki paidbah nongjied, da ka akor ka burom babha, da ka jingtreikam kaba khuid ba suba, da kaba pyrkhing bha ia ka por treikam, da kaba pynstet ia ki kam ba iadei bad ki paidbah bad ban ym phah ap slem ia ki kam kiba iadei bad ki paidbah.

Nalorkata, ka kam kaba ap hakhmat eh ia ki EC ka long ba kin thaw ia ki ain kiba tei na ka bynta ka bha ka miat jong ki paidbah Khasi bad Jaintia (Tribal) kumba la pruid dak bad pynkhambor da ka Sixth Schedule. Ha ka jingshisha ka District Council ka la dep don naduh ka snem 1952, la 67 snem lynter, hynrei kino kita ki ain ia kiba la thaw haduh mynta bad kiba la ai jingmyntoi bad iada ia u paid riewlum Khasi bad Jaitia ban pynthikna ba kin roi ki san, kin long rangbah bad iada na ka jingshah iuhroit? Haduh kine ki sngi ngim pat don thikna ia kiba kum kine ki ain. Balei ki 67 snem ki la shu sep-ei? Ngi dang donkam ia ki ain kiba iada ia ka khyndew ka shyiap. Ki District Council kim pat don kawei ruh ka ain halor kane ka sobjek. Kumba ka long mynta, jan baroh ka khyndew la klun  da ki heh spah bad ki riew shimet. Ka khyndew jong u paidbah bad ki Ri Raid baroh, mynta ki la kylla long ki khyndew tang jong ki khyndiat ngut ki heh spah bad ki riew shimet. U paidbah, u luk u lak, ki baduk ba raitoi kim don khyndew, ki nongrep babun kim don khyndew lajong ki shu rep wai ha ka khyndew jong kiwei. U baduk bad ki paidbah babun balang kim lah shuh ban don khyndew namarba kim lah kot bor shuh ban thied khyndew. Kane ka dei ka jingshisha. Shano ka lawei jong ki paidbah Khasi Jaintia kan leit? Hato kin shu long mraw bad rephiwji ha la ka jong ka Ri? Ka long kumta, kumba ka long mynta. Ka khyndew ka shyiap ka dei ka sobjek jong ka District Council hynrei peit ka la leh aiu halor kane ka sobjek. Shano kita ki ain ban iada ban ai biang ia ka khyndew sha ki paidbah? Dei ka sorkar jylla kaba la wanrah ia ka ain ba la khot Land Transfer Act hynrei kane ka ain ruh ka khlem lah ban iada ei ei ruh. Bun ka khyndew mynta ka la leit sha ki riewshimet, ki heh saipan, sha ka sorkar bad sha ki Institution ne ki Kompeni aiu re.

Nangta, ka District Council ka donkam ban thaw ain halor ban iada ia ka Mei Mariang kaba la dkhaw bha mynta bad sa katno ka Mariang hi kan sa ai jingsneng ia u khun bynriew kumba ka la dep sympat ha kine ki snem ba la lah. Ki E.C ki dei ban thaw kloi lan ki ain kiba iada ia ka mariang bad ban pyntreikam kloi lan ia kita ki ain ban lait ia ka jingjot bymjukut. Ka District Council ka don ka bor ruh ban thaw ki ain halor kumno ban iada ia ki wah, ki Phud um bad ki Pung ki Thwei hynrei, haduh kine ki sngi ngim iohi satia ia kita ki ain, shano ki don. Ki wah, ki phud um, ki pung bad ki thwei ki la dkhaw bha mynta. Ha ka jingshisha bun na ki, ki la rit bha bad ki la don ruh kiba don um tang ha ka por hap slap. Nalorkata, ki dohum kum ki dohkha, ki shalynnai, ki dohsher, ki dohthli, ki shersyngkai, ki ktung, ki dohjei, ki dohmain bad bun jait kiwei kiwei ki dohum la bun ba duhjait. Halor kane ka bynta ruh ka District Council ka don ka bor ban thaw ain bad ban pyntreikam ia ka ain ban iada ia kine baroh.

Nangta, shano kita ki ain ban iada ia ki riti ki dustur, shano kita ki Khasi bad Jaintia Tribal research Centre ba la buh da ki District Council. Shano kita ki Library bad ki computerised research centre bala buh da ki District Council ki ban lum thup ia ki jingthoh bad ki rekod baroh ban suk ki longdien mandien ban wad jingtip ne na ka bynta ki samla pule lajong ban lum thup na ka bynta ki jingdonkam jong ki ha ki project bad ki jingpule ha ki kolej ne university?. Balei, ki District Council ki iohthiah ha kine ki 67 snem ba la lah? Kyndit bynriew bad to leh ia kaba dang lah ban leh mynta ioh ngim ioh leh shuh lano lano ruh. Ngi ngeit ba dang don ki bynta kiba dang lah ban leh wat mynta ba la dier por ruh. Ngi khmih lynti ba ki MDC kiba la jop ha kane ka kynti kin leh ia bun kiei kiei kiba khlem pat leh da ki longshuwa jong ki. Na ka bynta kane la donkam ba ki MDC kin imsngi, pyrkhat bad leh ia kaba dei ban leh. Ka Sixth Schedule ka la pruid dak bun kiei kiei. La kyntu jur ia ki MDC bamynta ban da pule bad ngam jylliew bha ia ka Sixth Schedule bad ki donkam ruh ban sngewthuh ruh ia ki ain kiba iadei ban kham lah ban shakri na ka bynta u paidbah. Lym kumta kan long lehnohei ia ki ban long MDC lada kim imsngi ha kine kiei kiei.