Kynduh nongpyniaid Toll Plaza ki nongialam ka KSU, FKJGP bad RBYF

Nongpoh: Khyndiat sngi hadien ba ki 25 ngut ki samla kiba la shah behkam na ka Toll Plaza kaba don ha Pahammawlein 20Mer, ki la kynnoh ba ka dawbah kaba la pynlong ia ki ba kin shah behkam, ka dei namar ba ki nongpyniaid ka Toll Plaza kim lah shuh ban siew bainong, namar ia ka bainong kaba dei ban siew sha kitei ki 25ngut ki samla, la hap ban siew noh sha ki sengbhalang kiba ju leit shim synniang na katei ka Toll Plaza.

Halor katei ka jing kynnoh, kumta ki nongialam jong lai tylli ki kynhun sengbhalang, kiba kynthup ia ka KSU, FKJGP bad RBYF, ki la hiar sha katei ka jaka ban pan jingshai na ki bor ba dei peit jong katei ka Toll Plaza.
Haba kynduh ia ki nongpyniaid jong katei ka Toll Plaza, ki nongialam jong kitei ki Lai seng, ki la ioh ban iakren bad ki heh ka Eagle Infra India Ltd, ia kaba la wan ban iakren da u Anup Bal kum u Toll Manager, ha kaba na ka liang jong u, u la ong ba kam don kaba kum kata ka jingwan shim synniang, da ki sengbhalang naduh ba la shimti da ka Eagle Infra.
Haba batai pat halor ka jingshah wengkam ia kitei ki 25 ngut, u la ong ba ia kitei ki 25 ngut ki samla la thepkam ha ka por ba la shimwai da kawei ka Kompani kaba la tip kum ka (Sahakar), hynrei kane ka Kompani kaba la shimwai mynta kam shem la don jingtip ei ei ruh em halor kitei ki 25 ngut.
Haba iadei bad katei ka jingshah kynnoh, na ka liang ki nongialam jong kitei ki 3 seng, ia kaba la kren ha ki lad pathaikhubor da u Bah Lumlang Mawnai, u la ong kum ki nongialam seng hi ki pynpaw ia ka jingsngewkhia haba mih kum kitei ki jingshah kynthoh kiba la pynthoh bria ia ki seng kiba don ha Ri Bhoi hi baroh kawei.
Ha kajuh ruh ka por, na ka liang u Bah Jayand Sylliang, Rangbah Shnong ka Pahammawlein, u la pynshai lang halor katei ka jingshahkynnoh, ha kaba u la ong ba kam don kaba kum kata ka jingshim donation da ki sengbhalang, kumba la kynthoh da kitei ki 25 ngut ki samla kiba la shah wengkam na kane ka khyrdop khrong khajna jong ka NHAI.
Ki nongialam sengbhalang ha Ri Bhoi, kiba la leit ban kynduh ia ki heh jong katei ka Toll Plaza, ki kynthup ia u samla Ferdynald Kharkamni na ka KSU, u Bah Bipul Thangkhiew na ka RBYF Bah Lui Lyngdoh bad u Bah Lumlang Mawnai na ka FKJGP.
Lah ruh ban pynkynmaw, ba ka daw kaba la pynkhih khohreh ia ki nongialam sengbhalang ha Ri Bhoi, ka dei hadien ba u Samla Robert Maring, u la pynpaw paidbah ba u Rangbah shnong ka Pahammawlein, u la ong ba lada thungkam biang ia kitei ki 25 ngut, ka mut ba kino kino ki kynhun Sengbhalang ki ioh shuh ban leit shim ia ka Donation napoh jong katei ka Toll Plaza.