U kyrtong ka Congress, u Bussinessman ym u Statesman: Dr.Donkupar Roy

Shillong,2 Iaiong:
Ka UDP ka la pyn long ia ka jingialap elek shon mynta ka sngi ha Sohra kaba long ruh ka sngi iewbah Sohra, la pynlong ia ka jingialang ha Madan Shad kaba rim ha Sohra, Khliehshnong ha kaba la ia donryngkat lang u President Rangbah ka UDP u Dr.Donkupar Roy , u MLA ka Sohra u bah Titos Chyne uba long ruh u nongpyniaid ia ka jingia lang, la don ryngkat u bah Teinwell Dkhar MDC Shella, u Rangbah Shnong ka Khlieh Shnong bad kiwei pat ki nongialam jong ka seng UDP. Haba kren ha katei ka jingialang u bah Paul Lyngdoh u kyrtong ka UDP ha kane ka elekshon MP Lok Sabha 2014 u la ong kane ka la dei ka por ba ka jaitbynriew kan kyndit bynriew noh ban phah ia u nongmihkhmat sha Parliament uba jam ka tyngam bad uba jur ka kam, bad uba dang biang ka rta ‘Pyndonkam ia ka wait kaba dang nep, ym ban lap miet ban ia shut ia kaba luin bad ka bym ler kam bad wat phah ia nga ynda nga la noh ka rta da nga la don 70—75 snem karta, namarba nga donkam ban pynlut por ban ialehkai bad ki ksiew jong nga, nga hap ban pynlut por ruh ban ai um syntiew ha

katei ka rta’ ong u bah Paul.
Haba phai sha u kyrtong Congress, u bah Paul Lyngdoh u la ong ba ki la don ki heh Congress kiba la ia kren bad u shaphang ka jingmih madan jong u ban ia khun elekshon bad u la jubab ia ki ha kaba u la ong “Nga la ong ia ki ba nga lei nga la mih sha madan thma shaei u kyrtong jong phi” (namar ba ha katei ka por ba ki iakren ka Congress kam pat pynbna Kandidet). U la ther tyngeh ruh ba u kyrtong ka Congress u Ma Vincent Pala u la mih madan ban ia khun elekshon hadien ka jingiaknieh tiket kaba jur na katei ka seng,”U kyrtong ka Congress u la mih madan hadien ba la shah bom shah tied ha la ing , bad ki sa phah ia u ban ong u ba biang eh” bynrap shuh u bah Paul.
Haba phai sha u Pastor PBM Basaiawmoit, u bah Paul u la ong ba lada ki paidbah ki pynjop ia u Pastor uba long u kyrtong shimet, kam dei ba ki pynkup burom ia u hynrei ki pynjynjar bad pynktha khlieh pynban ia u, u la takrain tyngeh ruh ia kiba bun ki jingkren kiba la mih kiba la wanrah ia ka jingsngewthuh bakla ha ka balang , ‘ ka long kaba bakla ban ber bih para balang’ ong u biang u bah Paul.
U Dr.Donkupar Roy haba ai jingkren u la ong ba baroh ki Party riewlum ha ka thain North East mynta ka kynti kim long marwei shuh kumba la shah kynnoh ha ka elekshon MP ba la dep, U la ong ba kane ka juk elekshon mynta ka dei ka juk Alliance, ka don ka UPA ka don ka NDA bad mynta ka UDP ka don ryngkat bad kiwei pat ki seng riewlum ha ka thain shatei Lam Mihngi hapoh ka lama jong ka North East Regional Political Front (NERPF) kaba don ruh bad ka NDa. Haba kynthoh halor u kyrtong ka Congress u la ong ba u bah Vincent Pala u dei u Bussinessman bad u businessman um lah ban long statesman. Haba phai sha u kyrtong shimet u Pastor PBM Basaiawmoit u Dr.Don u la ong ba u Pastor u la noh ka rta bad u la don kumba 70 snem tam , kam long kaba suk ban tur sha Parliament khlem ka jingshemphang, bad ban ioh ia ka jingshem phang donkam ban don ym tang san snem bad ka rta jong u pastor kam iahap shuh ban ap haduh ban da shemphang bha. La ioh ruh ki jingkren na u MLA ka Sohra u bah T.Chyne ha kaba u la pynkynmaw ba la san snem mynta ka Sohra kam pat ju ioh pdiang tang iwei i skhim rit ruh na u MP uba ka Sohra ka la pynjop ha u 2009.