Ka jing ia khaii vote

Ka elekshon sha Khasi bad Jaintia hills District Council, ka dang shu kut shen, hynrei ka phang, kaba ngi hap ban iakren hangne, ka long ka jing ia die tad dor ia la ka jong ka vote bad katei ka dei ka jyrsih kaba la jubor than ha kine ki sngi ha bun bah ki Con stituency, ha kaba la iohi ba ka pisa ka la kren briew haduh katta katta ha kaba ia khroh vote.
Ha shwa ka elekshon, kaba long shisngi, ar sngi, shi taiew lane ar taiew, kiba bun ki paidbah ki long kum kum ki sniang, kiba makia bad kiba ap ban don ba kawang jawa ba kin bam bad kitei ki shu kynrup katba ioh, lada dei ka bam bang lane lada dei ka bam pyut ruh, hynrei ki ap thap beit ban don ba bsa ia ki.
Kam dei pat ban kynnoh ruh tang ia ki paidbah, namar wat ki kandidet lane ki parti, ki la hikai bad pynbor hi ma ki ia ki paidbah, ba kin ia bam pisa bad kane ka la long ka jyrsih kaba la ktah mationg ia ka longbriew manbriew jong u khun khasi khara.
Ha kiba kum kine ki por, ngi iohi ba ym don riew niam lane riew pyrthei, hynrei la ia jyrsih lang ha katei ka thap pisa ioh ei bad ba la ia leit tur sha kato ka liang, kaba kham pahuh ban bsa.
Ngim tip balei ba ka long kumne ka long briew manbriew ha kine ki sngi, ha kaba bor jong ka synshar paidbah, ka la kylla noh pynban ka bor jong ka synshar pisa bad kam dei shuh ka jingjied ia u nongmihkhmat, hynrei, ka la kylla long ka jingjied ia u nong don pisa bad kumta uba bun pisa, un long u nongmihkhmat.
Kat haduh mynta, ka paw shai ba ki bor sorkar, ki bor shnong, ki bor niam lane ki bor seng bhalang, kumba ki la pheil ha kane ka bynta, namar ba kim lah satia ban khanglad ia kane ka jing lalot pisa kaba don ha ka janor jong uwei pa uwei u nongthep vote bad lada kane ka jingjia ka iai bteng, kumta ngin sa iohi ba ha ka jaka ban ioh nongmihkhmat, ngin ioh nangne shakhmat da ki nongthaw pisa suda.
Ka elekshon MP, kan sa wan poi noh, sa tang shibnai tam ne duna bad ka jingkhot ka long, la ka elekshon komishon, ka don ne em ia ka lynti ban pynduh pyndam ia kane ka jing lalot pisa jong ki paidbah bad ka jing pynbieit jong ki kandidet ruh kumjuh bad ba katei ka rai kan long kaba jop, ngi iohi, kumba ka jing ia trei lang bad ki bor shnong, kumba kan long kaba donkam bha. [rms]