Ki seng trai ri kin nang iapait shuh ha jaka ban iatylli, ong u Bah Pala

Shillong: U MP ka Congress na Shillong, u bah Vincent H Pala u la kam ba ka jingthmu ban thaw ia ka kynhun jong ki seng trai ri ha kane ka dong mihngi, kan nym poi shaei shaei ruh hynrei kin nang iapait iapra shuh.
Kane ka jingkren jong u bah Pala ka long hadien ba u Working President ka UDP u bah Paul Lyngdoh u la ong ba ka donkam ban don ka kynhun jong ki seng trai ri ha kane ka dong mihngi ban ialeh pyrshah ia ka Congress bad ka BJP.
“Ka jingphoh sniew ban thaw ia ka kynhun ki seng trai ri, kan sah tang ha ka jingphoh sniew kam nym poi shaei shaei ruh. Kane kam dei ka jingmut kaba thymmai, wat khmih lynti ba kin iatylli ki seng riewlum hynrei kin sa nang iapait”, la ong u Bah Pala.
Ha kawei ka liang, u bah Pala u la kyntait ban iasoh bad ka NPP kumba la her ka khubor shane shatai ha kine ki sngi.
“Nga dei paralok lut baroh kiba dei na ka NPP ruh naduh u Conrad, Sniawbhalang, Prestone, Comingone bad kiwei hynrei kam mut ba ngan rung party”, u la ong.
U la ong ba ki don kiba kwah ia u ban rung ha ka NPP hynrei kum u briew uba la im bad shakri ha ka seng Congress, um don kano kano ka jingthmu ban ieh ia ka.
“Ki don kiba kwah ba ngan iasoh NPP hynrei nga la iohi ba kum u MP, ki seng riewlum kim don kam ha Parliament (national) namar ba lada iakren ha India, donkam ia ka jingbun paid bad tang uwei ne ar ngut u MP, kam don jingmut”, u la ong bad bynrap, “Sa kawei nga la ieh ia ka kam sorkar ban iasoh bad ka Congress bad ngam dei ban mih na ka Congress”.
Halor ka tiket MP na Shillong, u bah Pala u la ong ba ka shong ha ka MPCC ba kan phah sha ka AICC ba kan shim ia ka rai iano ban pyniakhun ha kane ka kynti namar ba ki don bun kiba pan tiket.
“Ka MPCC kam pat rai ia u kyrtong MP bad ka party kan sa shim ia ka rai namar ba ngam dei marwei uba pan tiket hynrei ki don kiwei ruh kiba aplai ia ka tiket”, u la ong.
Hynrei ha kajuh ka por, u la ong ba ka long kaba eh ban ong ban jop ne rem ha kane ka elekshon MP ban wan na Shillong hynrei ka shong ha u paidbah ban rai bad kyrmen ba kan jop hynrei ka shong ha u paidbah.