Ka NPP ka la rai ban pynieng kyrtong baroh 25 ngut na Dong Mihngi:Conrad

Shillong: Ka jingorpait hapdeng ka NPP kaba ialam ia ka sorkar bad ka UDP kaba paralok bah eh ka sorkar MDA, ka la kham heh shuh, namar ba haduh mynta ka NPP ka pynpaw ba ka kwah ban pyniakhun kyrtong ha baroh 25 tylli ki MP konstitwensi kiba don ha ka dong mihngi ka India.
Haba pynthikna ia kane, u Myntri Rangbah ka jylla uba dei ruh u President rangbah ka NPP u Conrad K Sangma u la pynkynmaw ba ka jingialang bah ka NPP dang shen ha Shillong, ka la shim ia ka rai ban pyniakhun MP ha baroh 25 tylli kiba don ha kane ka dong mihngi ka India.
Ka dong mihngi ka India baroh kawei kaba kynthup 8 tylli ki jylla, ka don 25 ngut ki MP, ba kynthup 14 ngut ha Assam, 2 ha Meghalaya, Arunachal Pradesh, Tripura, Manipur bad mar kawei ha Mizoram, Nagaland bad Sikkim.
“Ka jingialang bah ka NPP dang shen, ka la rai ban sei kyrtong ban iakhun ha baroh 25 ngut na kane ka dong mihngi”, la ong u Conrad.
U la ong b aka party kan sa bishar hadien ba la ioh ia ka aplikeshon jong kito kiba kwah ban iakhun bad ia ki lad ki lynti kumno ban leh.
“Ngin sa peit ia ki lad ki lynti ha kano ka rukom bad ia ki aplikeshon kiba pan tiket ban ialeh bad halor kane ka Central Election Committee (CEC) kan sa bishar ban shim ia ka rai”, la ong u Conrad.
Lah ban kdew ba ka UDP ka la dep ban pynbna bad tyrwa ia u Dr Jemino Mawthoh kum u kyrtong sha ka elekshon MP ban wan. Kumba ka paw, ka UDP ka la kyrmen ba ka NPP kan ai ia ka jingkyrshan lem bad kiwei ki party ba don lang ha kane ka sorkar MDA khnang ban don tang uwei u kyrtong monlang.
Ha kawei ka liang, u Conrad K Sangma ula kyntait ban weng ia ka BJP na ka sorka MDA kumba la pynpaw pyrshah da ka UDP dang shen.
“Kam don satia kano kano ka jingthmu ban weng ia ka BJP na ka sorkar MDA kumba la pynsngew da ka UDP. Ka jingdawa ban weng ia ka BJP na ka sorkar, ka dei tang ka jingsngew jong u riew shimet bad kam dei satia na ka party”, u la ong.
U la ong ba ki MLA ka BJP ruh ki la pyrshah jur ia ka Citizenship Amendment Bill bad ki la thoh ruh sha u president ka party ban pyrshah jur ia kane bad kane ka dei ka lynnong ban nym iakren shuh ia mynta.