Duh tulop biang ki nonghikai Deficit, naduh Rymphang

Shillong, 31 Lber:
Wat la ka sorkar ka la kular ban pynlait ia ka tulop man u bnai ia ki nonghikai skul hynrei kane kam pat jia satia ha kaba ki nonghikai deficit ka East Khasi Hills kim pat ioh tulop satia jong u bnai Rymphang ba la dep.
Haba kren mynta ka sngi, sha ki lad pathai khubor, u president ka KJDSTA u Bah ED Nong siang u la ong ba ha ka jingshisha ka sorkar ha ki jingialang ba la dep shakhmat, ka la kular ban pynlait noh ia ka tulop man u bnai hynrei kaba sngew sih ka long ba kane kam long satia kumta. “Ki nonghikai skul kiba hap ha East Khasi Hills kim pat ioh tulop satia jong u bnai Rymphang”, la ong u Bah Nongsiang bad bynrap, ba katkum ka jingtip ba la ioh, ia ka pisa jong ka tulop ki nonghikai kane ka district, la pyndonkam shawei bad ki la leh da ka Re-approriation (RA).
“Kane ka long kaba sngewsih namar ba ka kam bad ka ktien kam iahap”, la ong u Bah Nongsiang.
Halor ka jingdawa ban shimti noh ka sorkar ne Regularisation ia ka kam nonghikai jong ki skul, u Bah Nongsiang u la iathuh ba ki nonghikai hapoh ka lama ka JACATAM ki la kyntu ia ka sorkar ba kan khot iakren noh halor kane. “Ngin la buh por ba ka sorkar ka dei ban khot noh ia ka jingiakren hapoh ka taiew baar jong u Iaiong halor kane ka kam”, la ong u Bah Nongsiang.
U la iathuh ba katkum ka jingtip, ki heh sorkar ki la wan phai na ka jingleit wad jingtip halor ka jingiadei bad ka kam provincialisation ia ka kam nonghikai skul na jylla Tamil Naduh bad Kerela.