Ka elekshon T.5lak

La iohi ia ki jing ialum paidbah ha kylleng ka Ri Khasi Jaintia, ki jing ia rwai ia shad, ia tem ia put, ia bam ia dih bad sa kaei pat ka bym don bad katei ka long ha ka jing pynkhreh ia ka elekshon MDC 2019 bad haba shu peit, la iohi, kumba kam iapher hapdeng ka elekshon MLA 2018 bad ka elekshon MDC 2019.
Haba ngi iakren ia kane, ngin hap kynmaw, ba ka jinglut jong ka elekshon MDC ka dei tang T.5lak, katba ka elekshon MLA 2018, la kynmaw, kumba ka dei T.25lak bad kitei ki jingkhein, kiba la buh da ki bor pyniaid elekshon, ki long tang shi damli, na kaba ki kandidet ki pynlut ha kine ki sngi.
Lada iakren beit ia ka elekshon MDC 2019, ngi iohi ba ka jing ia iaid ia ieng, ia rwai ia siaw, ia bam ia dih, ia put ia tem, ia shong kali sahuh bad sa ki jing ia tyrwa pisa bad kiwei kiwei, ki la palat da ka bun phew shah, ia katei ka mang T.5lak bad lada ka tnat District Council, kam lah ban teh lakam ia kitei ki jing pynlut maphot, ka la dei ban sangeh noh, kaba buh kyndon, hynrei, ka dei ban ailad ba ki paidbah, kin ia dih kdang, ia bam kdang, ia shong kali kdang bad kumta ter ter bad ba u kandidet, un ia sei maphot ia la ka jong ka pisa, lada dei u san lak, u shiphew lak ne u hajar lak ban ia muja ki nongthep vote.
Ban pyn urlong ia katei ka 5lak, ka dei ban don ka kyndon kaba thikna bha bad lehse ka tnat District Council Affairs, ka lah ban shim nuksa, na ki rukom pyniaid jong ki Dorbar Shnong bad kata ka long ban nym ailad ia ki jing ia kanbas paidbah, hynrei ban don beit tang kawei ka rynsan bad ban nym shah ia ki kandidet, ba kin iaid da ki phew kali, hynrei ban don tang kawei ne ar tylli duh ki kali ki ban synran ia u kandidet bad nangta ban nym pynjrong than ia ki sngi iaid kanbas bad kitei ki dei ki lad kiba lah ban teh lakam ia ka jing pynlut pisa kham bun bad lehse ban tyllun ia ka dor jong ka 5lak tam ne duna.
Ka elekshon, ka dei ia u duk u rangli, u dap klur bad u dap million ruh kumjuh bad lada ka dei ka elekshon theh pisa, kumta kam dei shuh ka elekshon ia u duk, ka dei tang ia uba riew spah bad ka tnat pyniaid elekshon, ka la dei ban shim ia ki lynti kiba ia biang lang ia baroh bad ban poi sha katei ka phang, ka donkam ia ka jingmynjur jong ki dorbar Shnong, kiba don ka iktiar ban teh lakam ia ki kyrtong ialeh elekshon. [rms]