Ka skhim ia ki nongrep lane ka PM Kisan Nidhi

U Myntri Rangbah jong ka Ri India, U Narendra Modi, u la pyllait ia ka skhim na ka bynta ki Nongrep ha ka 24 tarik u bnai Kyllalyngkot, 2019. Ia kane ka skhim la jer kyrteng ka Pradhan Mantri Kisan Samman Nidhi lane PMKSN bad lada pynkylla ha ka Khasi ka mut ka Skhim ai sngewbha ia ki nongrep da u Myntri Rangbah.
Kane ka skhim ka long ban ai da ka peisa T.6000/- shi snem na ka bynta ki nongrep barit bad kiba duk jong ka Ri India. Ki nongrep kiba duk bad kiba tlot bha ha ka ioh ka kot (small and marginal farmers) ki ioh ia kane ka skhim bad lada ki don khyndew ruh ka jingdon khyndew ka long tang 2 hectare shapoh. Ki nongrep kiba duk ki bym don khyndew ruh hynrei ki rep wai jong kiwei ki lah ban ioh ia kane ka skhim. Ia kane ka peisa yn ai laisien ai ha ka dor T.2000/- shisien ai bad ia kane ka peisa la thep ha ka Account jong ki nongrep ha Bank. Kumta, ki nongrep kiba dei ban ioh ia kane ka jingai sngewbha (Samman) ki dei ban don la ka jong ka Account ha kano kano ka bank, la ka long ka State Bank, MCAB, MRB, UBI, BoB, PNB ne kiwei kiwei.
Ki nongrep kiba rep ai ha ka khyndew jong kiwei, ki dei ban don ka jingthoh kaba shai kdar na u trai lane na ki trai khyndew ba ki dei ki nongrep wai. Ki nongrep kiba rep ha ka khyndew lajong ki dei ban don ka dulir kaba thikna ba la pynskhem da ka ophis jong u Syiem, Lyngdoh, Dirdar lane ka ka District Council lane la register ha D.G ophis ban pynshisha ba ki longtrai.
Ia kane ka skhim la pyntreikam lane la ai lyngba ka Agriculture ophis jong ka sorkar bad u ban shim ia ki aplikashon un dei u District Agriculture Officer lane u DAO. Khnang ba ki Nongrep kin kham shai shuh shuh shaphang kane ka skhim lah ban leit kylli bniah na ki DAO ha la ki jong ki jong ki District.
Da U Bah Philip Marweiñ