Bym iarap ka Sorkar, sher dara ka MC bad Nonghikai ban shong ki khynnah skul

Nongpoh: Wat la khlem kino kino ki jingiarap na ka sorkar, hynrei na ka bynta ban pyn-urlong ia ka jingthrang ki khynnah kiba kwah ban leit skul, ka pynlong ia ka Managing Committee bad Nonghikai jong ka LP School SSA ha Khliehumwang, ba kin hap ban shim hi ia ka jingkitkhlieh na ka bynta ban shna thymmai ia ka iing sher dara ban pynlong kum ka jaka ban aijinghikai ia ki khynnah skul, kata hadien ba ka iing jong katei ka skul, ka la shah pynpra noh ha ki Pulit ka Assam.

Lah ruh ban kdew hangne, ba ka daw hi kaba la pynlong ia ki khynnah kiba leit ha katei ka skul ba kim pat ioh ban shong klas kat haduh ki ki sngi, ka dei hadien ba ka skul kaba la shna kyrpang na ka bynta ban shong ki khynnah mynta u snem, ka la shah pynjulor bad pynpra da ka Puhshilum, kaba la wanrah da ki Pulit ka Assam ha u snem ba la dep.
Haba iadei bad kitei ki Iing sher dara, ia kaba la tei da ka MC bad ki Nonghikai, haba iakren bad u Bah K. Muktieh, Rangbah shnong ka Khliehumwang, u la ong ba kat haduh mynta ym pat dep lut bad kam pat biang na ka bynta ban sdang shim klas ia ki khynnah.
U la ong, ba ka jingpyntrei ia kitei ki iingdara ban pynlong kum ka skul, ka la iaid shaid shaid, ha kaba ki la don ki bynta kiba la dep bad ki don ruh ki bym pat dep.
Shuh shuh, u la ong ruh ba ka ka daw hi kaba la pynslem ban pynlong ia ka skul bad shim klas ia ki khynnah, ka dei namar ba mynta u snem ki bun bha ki khynnah kiba dang wan thymmai bad haba khein kyllum lang baroh ki la don palat spah ngut, namarkata ka shem shitom ia ki nongpyniaid skul bad nonghikai ban sdang skul noh khlem pat da biang ka jaka shong ki khynnah.
Haba kylli, la ki ioh jingiarap ne em na ka sorkar, ban shna ia katei ka iing dara, u Bah K. Muktieh, u la iathuh ba kat haduh mynta hi kim pat ioh kano kano ka jingiarap, hynrei la shu kitkhlieh hi da ka MC bad nonghikai.
U la iathuh ruh, ba haba iadei bad kitei ki iing sher dara la jan dep, hynrei ki dang don sa katto katne kiba dang sahkut, ia kaba kin sa lah ban pyndep shen bad ynda la dep kin sa sdang noh ia ka jingpynlong skul.
“Dei hangne nga sngewthuh ba ka sorkar jylla kam ju phai khmat ia ka jingeh kaba ngi kum ki paidbah kiba sah ha khappud ka Meghalaya-Assam ngi iakynduh. Wat hadien ba ka skul jongngi ka la shah pynpra noh ha ki Pulit ka Assam, hynrei ngi lap ba ka sorkar jylla kam shem la shimkhia satia, jin lada dei ba julor ki skul ha ki shnong ba kham long sor, nga tharai ki la leit jurip wut wut” kren sngewkhia u Bah K. Muktieh.
Mynta lei ngi la ngiah ban pyntip, namar ngi la lap ia ka jingbym shimkhia da ka sorkar, ia kaei kaba ngi dang lah ban leh ngi leh hi, hynrei ia kaei ka bym lah shuh ban leh, ngim banse ban shu ieh kumto, u la bynrap.