Mynta yn rai ki 7 lak tam ha KHADC bad ki 2 lak tam ha JHADC

Shillong: Ka 27 tarik u rymphang ka dei ka sngi ba ki paid nongthep vote jong ka ri Khasi -Jaintia kin ai ia ka rai na ka bynta ban jied ia u MDC jong ki ha ki 58 tylli ki konstitwensi kata 29 ha KHADC bad 29 ha JHADC. Ha KHADC ki don 7,95,143 ngut ki nongthep vote bad na kitei 3,83,633 ngut ki dei ki shynrang bad 4,11,468 ngut ki dei ki kynthei. Ha JHADC pat ki don 2,49,334 ngut ki nongthep vote bad na kitei 1,20,675 ngut ki dei ki shynrang bad 1,28,592 ngut ki dei ki shynrang.
Ha KHADC ki don 1433 tylli ki Polling Station katba ha JHADC pat ki don 408 tylli ki Polling Station, yn pyndonkam haduh 2745 tylli ki EVM ha baroh ar tylli kata KHADC bad JHADC. Ha KHADC kin don 130 ngut ki kyrtong ki ban ia aireng katba ha JHADC pat kin don 101 ngut ki kyrtong. Kiba bun na ki konstitwensi ha JHADC ki dei kiba ka jingiakhun ka long para marwei.
La pynbiang ia ki bor pahara ban pyniaid beit ia katei ka elekshon MDC bad la phah khambun ki bor pahara sha ki thaiñ khappud jong ka Meghalaya bad Assam, ong ka khubor na ka sorkar.Ka dei ruh ka sien kaba nyngkong ba yn pyndonkam ia u NOTA ha ka elekshon MDC kaba la buh khnang ia ki paidbah ki bym mon ban thep iano iano ruh, hynrei ba kin ioh ban pyndep ia ka jingthep vote jong ki.