Kyrshan Congress ka NCP ha Shillong bad Tura

Shillong, 31lber:
Ka Nationalist Congress Party (NCP) ha ka jylla hapoh ka jingialam jong u bah Sanbor Shullai, State President ka la shim ia ka rai ban kyrshan ia ka seng Congress ha kane ka elekshon MP Lok Sabha 2014 na Shillong bad Tura Parliamentary Konstitwensi. Namar ba u President ka NCP u bah Sanbor u dang don hapdeng ka jingshitom, haba ia kren sha ki nongthohkhubor, u bah Wanbok Lyngdoh u la wan mihkhmat na ka seng NCP ha ka jaka u bah Sanbor. U bah Lyngdoh u la ong ba ka daw kaba la pynlong ia ka NCP ban kyrshan ia u bah Vincent Pala u kyrtong na Shillong bad u Daryl Ch Momin u kyrtong na Tura ka dei namar ba ka NCP ha kane ka kynti kan shym la pynieng kyrtong bad namarba ka NCP ka la don lypa ka jingiatreilang bad ka Congress ha ka sorkar UPA I bad II, kumta katei ka seng ka la shim rai ban kyrshan noh ia ka Congress. La phah ruh da ka shithi sha u bah Sanbor Shullai da u S.R Kohli Permanent Secretary Member Working Committee, ha kaba u la pyntip sha u bah Sanbor ba u President Rangbah ka NCP u Sharad Pawar ha ryngkat ka jingiasngewthuh jingmut lang bad u General Secretary & Incharge Northeast State u Praful Patel, ba namar ba ka seng kam shym la pynieng kyrtong ki la ai jingmut ba ka seng kan kyrshan noh ia ka Congress.
Ha ka jingiakynduh bad ki nongthohkhubor, ka NCP ka la wan ryngkat bad ki nongialam jong ka seng Congress ba kynthup ia u bah Oris Lyngdoh , ha kaba na ka liang ka Congress ka la pynpaw ia ka jingsngewkmen namarba ka NCP ka la ai ka jingiatreilang.