Bym iasngewthuh jingmut phet u Doktor bad Nurse, khang ia ka Dispensary na Jirang

Nongpoh: Haba shimkhhia ia ka jingujor na ki paidbah ka thain Jirang, kiba la iakynduh jingeh hadien ba la khang noh ia ka Dispensary ha shnong Umsier, Jirang, na ka liang ka HNYF, Jirang Circle, ka la pynpaw ia ka jingsngewkhia ban tip ba ka daw kaba la pynlong ia katei ka Dispensary ban khang khyrdep, ka dei tang namar ka jingbym iasngewthuh jingmut hapdeng ki nongtrei hapoh jong katei ka jaka sumar lem bad ki katto katne ngut ki briew jong katei ka thain.
Haba pyntip sha u Nongthohkhubor, u Bah Intor Ranee, President ka HNYF, Jirang Circle, u la ong ba ka seng tang mar ia ioh jingtip ba la khang khyrdep ia katei ka jaka sumar paidbah, ka la pynlong ia ka jingleit jurip bad ha katei ka jingjurip ka la lap rup ba katei ka Dispensary, ka la khang khyrdep mynta ka katto katne sngi khlem da don satia ki nongtrei.
U Bah Intor Ranee, u la ong ba ka seng kam lah khlem da pynpaw ia ka jingsngewkhia halor ka jingkhang khyrdep noh ia katei ka jaka sumar, namar ka dei kawei na ki jaka ai jingsumar ia kiba bun phew tylli ki shnong kiba don ha katei ka thain bad khamtam eh ia kito kiba wan na ki longiing kiba duna ka jingioh.
“Ha ka jingjurip bad tohkit da ka seng, la lap ba ia katei ka Dispensary, la pyniaid da kawei ka NGO kaba na Nongbah Shillong, hynrei haba iadei pat bad ka jingkhang khyrdep pat, ka seng ka la lap ba ka daw hi namar ka jingbym iasngewthuh jingmut hapdeng ki ki nongtrei jong katei ka Dispensary lem bad ki nongialam shnong jong katei ka thain bad kaba la pynjynjar pat ia ki paidbah kiba donkam ban leit shah sumar ha katei ka Dispensary” ong u Bah Intor Ranee.
Haba iadei bad katei ka kynrum kynram hapoh jong katei ka jaka sumar paidbah, na ka liang ka seng ka kyntu ia u Syiem ka Hima Jirang bad khamtam eh ia katei ka NGO kaba la pyniaid ia katei ka Dispensary, ba ki pynlong da ka jingiakren bad ki Sordar shnong ha ryngkat ka jingiadonlang ki nongtrei hapoh ka jong katei ka jaka sumar, khnang ban weng noh ia kitei ka jingbym iasngewthuh jingmut bad kaba la pynjynjar pat ia ki paidbah ba bun balang.