Shongshit ka pynher kot kudi ha Shillong bad Ampati

Shillong,30 Lber:
Kum shi bynta ban pynshlur bad pynsngew thuh sha ki paidbah ia ka jingdonkam ba kin pyndep ia ka hok thep vote jong ki ka ophis u District Election Officer, East Khasi Hills, Shillong ha ka 29 tarik u lber ka la pynlong ia ki jingiakop bapher bapher ba kynthup ak jingiapynher kot kudi tang na ka bynta ki khynnah rit bad ka jingiakop hapdeng ki ba la ioh ban thep vote, la pynlong ia katei ka jingiakop ha madan Golf links, Shillong. Kiwei pat ki jingiakop nalor ka pynher kot kudi ki kyn thup ia ka jingialehkai Maw point, ka phawar bad kiwei.
U Deputy Commissioner ka East Khasi Hills u Mr. Sanjay Goyal u la wan ban ia don bynta lang ha katei ka jingiakop, bad u la sam ruh ia ki khusnam sha ki nongjgop.Ia ka nam lahduh ha ka jingiapynher kot kudi la ioh da u Johny Kharkongor, ia ka nam kaba ar la ioh da u Anthony Nongkhlaw bad kaba lai u Y. Sun. Ha ka jingialehkai Maw point ka Seng Khasi Pynthor A ka dei ka nongjop bad kaba wan ba –ar ka dei ka Seng Khasi Pynthor B katba kaba lai pat la ioh rah da ka Leslee and Group. Ha ka phawar la ioh rah da u Banker Kharkongor, kaba ar CTE, PGT, Shillong bad kaba lai la rah da u Banteilang S. Nongdhar.
Ha manla ki jingiakp ki nongjop kiba ioh ia ka nam lahdudh ki ioh mar T.10,000 tyngka , ba-ar T.7000 tyngka bad kaba lai pat T.5000 tyngka. Ha katei ka sngi la wan ruh ban pynshngain lang da ka kynhun rwai ka Shillong Chamber Choir kaba la sei ki sur rwai jong ka bad la wan ruh ban pyn byrngia da u nongleh jadu ka Shillong u John Lanong.
Ka jingiapynher kot kudi ha kaba la pynlong da ka tnad Elekshon ka jylla ha ryngkat ka jingiatreilang bad ka District Election Office, South West Garo Hills kaba la long ha madaan ia lehkai ha Ampati ka long ka la shongshit bha. Ha katei ka tamasa pynher kot kudi la wan ban ia shim bynta haduh kumba 200 ngut eiei ki samla bad kiba bun hi ki dei ki khynnah pule. La pynlong ia katei ka tamasa ha ka sngi palei jong ka taiew ba la dep.
La pynlong ia katei ka tamasa shi bynta kum ka jingialap jong ka SVEEP ka buit ban pyniar ia ka jingtip sha ki paidbah ba kin pyndonkam hok ia ka vote jong ki ha kane ka elekshon Lok Sabha ka ban sa long ha ka 9 tarik u iaiong. Shuwa ban sdang ia ka jingiapynher kot kudi ki nongiashim bynta ki la bam smai shuwa ba kin pyndep hok ia ka vote jong ki.
Ha katei ka tamasa la wan ban ia shim bynta da u Commissioner & District Election Officer, Ampati, u Mr. Ram Singh, ki heh ophisar bad ki nongtrei jong ka tnad elekshon bad kiwei pat ki heh ki hain jong ka District, kiba la ia snoh kti lang ha ka pynhere kot kudi. La pynlong ruh ia kiwei pat ki jingiakop nalor ka pynher kot kudi.