Shillong: Ka UDP ka la sei madan ia ki kam suri kup snieh langbrot ka seng Congress khamtam ka jingkynnoh bad tei pop jongka, ba ka UDP ka iadei paralok bad ka BJP kaba la wanrah ia ka Citizenship Amendment Bill (CAB) 20116.
Haba kynther tyngeh ia kane ka jingkynnoh ka Congress kaba la pyndonkam da u president barim ka HSPDP u Bah Ardent M Basaiawmoit ha ki jingialap elekshon MDC, u Vice President ka UDP u bah Allantry F Dkhar mynta ka sngi, u la sei ia ki sakhi ba ka Congress ka dei kaba nyngkong tam ban shim ia ka rai ha u snem 1947 ban pdiang bad ai jingiada ia ki Hindu kiba sah ha Pakistan.
“Nga la ioh sngew ba ki nongialam ka Seng Congress ki la kynnoh ha ki jingialap elekshon ha Mawryngkneng, Jatah, Jaiaw bad ha kiwei ki jaka ba ki seng riewlum ki donkti bad ka BJP, hynrei nga kwah ban sei ia ki sakhi ba ka Congress ka la shim ia ka rai ha u Naiwieng 25 tarik 1947 ban ai jingiada bad ban khot ia ki bym dei Muslim ban wan sha India. Kane ka long katkum ka India’s Struggle for Freedom: Select Documents bad ki jinglum jingthoh na u Jagdish Saran Sharma – Volume 3 page 835”, la ong u bah Allantry.
U Bah Allantry u la ong katkum ka khubor Economic Times ha ka 2 tarik Jylliew, 2015, ka Congress na Assam ka la shim ia ka rai ban pdiang ia ki Hindu, bad kiwei ki jaitbynriew bym dei ki Muslum ban wan sha Assam. Ka la kyntu ia ka sorkar pdeng ba kan ai hok nongshong shnong ia ki Hindu Bengali, Sikh, bad kiwei lait noh ki Muslim kiba wan sha Assam hadien ba ki la shah pynshitom hadien ba la pyniakhlad ia ka India bad ka Pakistan.
“Ka sorkar Assam ha u snem 2011, ka la shim da ka rai ban ai nongshong shnong ia ki Hindu Bengali, Sikh, Jains, Parsis, Buddhist, Khristan”, u la ong bad bynrap, “ha ka 20 tarik Iaiong 2012, ka la phah sha ka sorkar pdeng halor kane ka rai halor kane”.
Shuh shuh u bah Allantry u la ong ba ha ka 15 tarik Nailar 2015, ka kot khubor Times of India, ka la pynmih ia ka jingthoh ba ka Punjab Congress ka la phah ia ka rai sha u Myntri Rangbahduh ka ri, u Manmohan Singh da kaba kyntu ia ka sorkar ban pdiang ia ki Hindu ban wan na Pakistan bad ka Punjab Congress ka la maham ruh ba lada ka party kam pdiang kan wanrah ka jingma ia ka seng Congress ha ka ri.
“Ngin shim khia ba ka jinglong nongshong shnong ki Bengali Hindu, Buddhist, Khristan bad kiwei ki rit paid kiba wan sha Assam na Bangladesh namar ka jingshah pynshitom na ka jingiaphiah ka India”, ka long ka jingkren u president ka Assam Pradesh Congress committee (APCC) u Anjan Dutta”, la ong u bah Allantry katkum ka khubor ba la mih ha Economic Times ha ka 2 tarik Jylliew 2015.
Kumjuh ha ha ka 17 tarik Naitung 2014, kaba mih ha ka India Today, ba u Myntri Rangbah ka Assam u Tarun Gogoi u la kyntu ia u Myntri Rangbahduh ka ri u Narendra Modi ban thaw ia ka polisi ban pdiang nongshong shnong ia ki Hindu poiwir na Bangladesh ha Assam bad ka kynhun ka sorkar jongu, ka la phah ia ka rai sha ka sorkar pdeng halor kane.
Ha kajuh ka por, u Bah Allantry u la ong ba ka UDP ka kyrshan ia kane ka sorkar MDA ba ialam ka NPP ym da ka BJP. Ka jingiadei bad ka NEDA, ka dei ban iakren ia ki kam pynroi hynrei ka UDP ka la weng noh hadien ba ka la wanrah ia ka Citizenship Amendment Bill namar ba kam sngap ia ka sur jong u paidbah kane ka thain lammihngi.
“Kat nang iaid ka por, la sngewthuh shai ia ka jingpynwan dur ka BJP khamtam ha kaba iadei bad ka CAB bad ngi sa dkhat syndon ia ka jingiadei”, la ong u Vice President ka UDP.
Haba kynthah ia u bah Ardent uba la shah pyndonkam ha ka Congress ban ialap elekshon pyrshah ia ki seng trai ri, u bah Allantry u la ong, “Watla u Bah Ardent M Basaiawmoit u la ong ba um pat rung Congress hynrei haba u briew u la laieng rynsan na Congress ngi dang lah ban ong da kumwei pat”.
U la bynrap, “Ki Congress kim pat ioh jinghikai kaba bha na la sem lajong”.
U la ong ba ka UDP ka kwah ban kren ia ki mat kiba iadei bad ki district council hynrei sngewsih ba don kiba pynher ia ka khubor lamler ban ialam bakla ia u paidbah.
“Nga lyngngoh ba ki nongialam ka Congress ha Meghalaya, ki kynnoh sngew kumba don bynta ma ngi ban wanrah ia ka CAB. Ngi kren beit ia ki mat ba ktah ia ka jaitbynriew. Ngi ong ruh ba ki seng ri thor kim don bynta ha district council namar ba ki nongialam ba ha khlieh jongki, kim dei ki jaitbyntiew Khasi, Jaintia”, u la ong.
“Ngin iakhun ia ka elekshon MDC bad iakren beit ia ki kam ba iadei bad ka district council, balei ki wanrah da ki mat ki bym iahap eiei bad ka district council”, u la bynrap.
Bjp ka shna da ka cab, congress ka leh jubor justi khlem ain. Bjp ne congress ki dei ki arliang jong ka pisa nar.