Maramot surok ki nongñiah kali ka shnong Shnongpdeng

Shillong: Myn hynnin ka sngi ki nongñiah kali jong ka shnong Shnongpdeng ki la ia mih ryntih ban maramot ia ka surok ka ban leit sha katei ka shnong. Haba ia kren bad u bah Lasting Lamin u la ong ba ka ki nongñiah ha ryngkat ki katto katne ngut kiba don ka mynsiem trei mon sngewbha ki la ia mih ryntih ban maramot dalade naba ka surok ka la sniew jubor bad ka la pynthud ia ka leit ka wan ki paidbah kiba wan jngohkai ia katei ka shnong kaba la paw ha ka kam jngohkai pyrthei.

U la ong ba ka jingmih jong ki nongñiah ban maramot ka dei namar ba ki sngewthuh ba ka kam jngohkai pyrthei ka dei ka kamai jong ki bad kumjuh ki nongshong jong katei ka shnong. U la kyrpad ia u MLA jong katei ka thaiñ ba un shimkhia ban siang rong noh ia katei ka surok naba lada ka long ha katei ka dur kan ktah ia ka kam jngohkai pyrthei bad ki nongwan jngohkai ruh kin sngew salia ban wan lada sniew palat ka surok. U la iathuh ba ia ki jinglut jingsep baroh kaba la lut mynta ka sngi la shu lum para nongñiah kali bad na kiwei pat kiba don ka mynsiem sbun ban noh synniang.