Kyntait ai jamin u CJM ia u heh ka CMJ University

Shillong, 28 Lber:
Ka kashari jong u Chief Judicial Magistrate (CJM),Shillong ka la kyntait ia ka jingpan jamin ong u heh ka CMJ University uba iajan bad u vice chancellor u Chandra Mohan Jha, u Dhanwan Singh Matharoo ha ka 26 tarik Lber.
U Matharoo uba dei u chairman ka Apex e-Learning Bangalore u la pan jamin hadien ba shah set 14 sngi ha ki pulit ba la shah da ka Kashari ha ka 20 tarik.
U CJM u B Joshi u la kyntait ia ka jamin ba la pan da u Matharoo bad un sa shah hajir biang ha ka Kashari ha ka 3 tarik Iaiong.
Ki pulit CID kila kem ia u Matharoo uba dei u vice chancellor ka Apex Professional University, Itanagar ha ka 9 tarik Lber.
U la shah kem ha dien ba u la wan poi sha Shillong na Bangalore hadien ba la shah hajir ha ki pulit CID ka jylla.
Ha kajuh ka por, ka thymmei khubor ka iathuh ba ha ka jingtohkit, ki pulit ki la lap ba u Matharoo u la pyniaid beain ia ki tnad jaka pule ha kylleng ka ri ha ka kyrteng ka CMJ University bad ka Apex e-Learning.
“Ki la pyndep ia ka jingpynrung kyrteng haduh 10,000 ngut tam ki samla pule ha ki tnad pule bapher bapher ka ri. Ka jingioh lum pisa ka la kot sha ki klur”la ong ka thymmei khubor.
“Ki pulit CID ki lah ban khot hajir ia kiwei ki nongtrei ba kham rit kane ka skulbah kiba plie ia ki tnad pule ha kylleng ka jylla” la ong ka thymmei khubor.
Ki pulit CID ki la ong ba kin kem ia u CM Jha hadien ba ka iing Kashari ba hakhliehduh ka Supreme Court ka la weng ia ka jingpan jamin u Jha,” la ong shuh shuh ka thymmei khubor. Ha ka 7 tarik Lber, ka Supreme Court ka la weng ka jingai jamin ia u Chanchellor ka CMJ University.