Shah ujor ka All India Radio, Shillong, na ka ktien “Sorkar Kmie”

Shillong, 28 Lber:
Ka dei ka khubor, kaba haba shu pyrkhat, kam dei satia ka khubor bad kata ka long ba haba uwei u rangbah, U Bah SK Lakiang, uba na Umlyngka, Upper Shillong – 5, ula phah ia ka jing ujor jongu sha ka All India Radio, Shillong, halor ka jingbuh ia ka ktien sorkar kmie, ha ka jaka jong ka ktien phareng, kaba la ong Central Government.
U Bah Lakiang, ula ujor sha ka AIR, ha kaba ula ong ba ka jingong sorkar kmie, ka dei ka kyntien kaba bakla bad kaba don ia ka jingmut kaba iapher pynban bad ba u ong ba ka sorkar jong kane ka ri, kam shym dei satia ka kmie bad ba ki Jylla bapher, kin dei ki khun shynrang ne ki khun kynthei jongka.
Halor kane ka phang, U Bah Lakiang, ula ai jingmut ia ka All India Radio, Shillong, ba kan buh noh, da kawei ka kyntien bad kata ka long ba yn buh da ka kyntien sorkar India lane sorkar pdeng nangne shakhmat, ha ka jaka ban khot sorkar kmie.
U Bah Lakiang, ula thoh ruh sha ki Sengbhalang kum ka KSU, KJWA, SSSS, ha kaba ula ai jingmut ruh ia kitei ki sengbhalang, ba kin ia trei lang, na ka bynta ban pynbeit ia katei ka kyntien, ha ki kotkhubor ruh, ba kin nym pyndonkam shuh ia ka kyntien sorkar kmie.