Ki seng saiñpyrthei ki don la ka hok ban rai, ong u Conrad ba thmu pynieng kyrtong ka BJP

Shillong: Halor ka jingthmu ka BJP ban pynieng kyrtong ha ka elekshon MP Lok Sabha na Shillong bad Tura Parliamentary konstitwensi u myntri rangbah ka jylla uba dei ruh u President jong ka seng NPP u la ong ba um sngewpher naba man la ki seng saiñpyrthei ki don la ka jong ka hok ban shim ia ka rai. U Conrad u la ong ba watla ka BJP ka dei kaba donlang hapoh ka kynhun synrop jong ka sorkar MDA hynrei ym lah ban khang ia ka mon jong kano kano ka seng.
U Conrad u la ong ba kam shym la don kano kano ka kyndon ban khang ia kano kano ka seng ban pynieng kyrtong hynrei u la ong ba ka dei tang ka jingmut ban sei ia u kyrtong monlang bad halor kane u la ong ba kin hap ban dang shong jingialang shuwa ban shim ia kano kano ka rai. Katba u bah Prestone Tynsong myntri rangbah ba-ar ka jylla u la ong ba hadien ka elekshon MDC kin shong jingialang bad kin shim ia ka rai. U Dr Donkupar Roy President ka UDP u la ong ba ka thong jong ka jingsei kyrtong monlang kan dei beit tang bad ki seng riewlum ym bad ki seng kiba heh.