Da 4-2 pynliem ka Laban ia ka Mylliem ha ka semi phainal ka RMKOFT

Nongstoiñ: Ka kynhun ialehkai jong ka Laban SC kala ioh ban rung syndon shaduh ka phainal jong ka lympung Rani Motor’s Knock out Football Tournamement bala pyniaid da ka Laitkseh Sport Club (LSC) hadien ba kala ioh ban khur ia ka jingjop ha ka jingiakhun ia ka semi phainal kaba khatduh eh jong katei ka lympung.

Ka jingjop jong ka Laban SC ia katei ka semi phainal jong katei ka lympung kadei hadien ba kala lah ban pynliem noh ia ka kynhun ialehkai jong ka Mylliem SC da 4 kol la 2 kol ha ka jingiakhun kaba la long hynne ka sngi ha ka madan Mawkynjoin Laitkseh.

Ka jingialehkai kaba la long hapdeng kitei ki ar tylli ki kynhun kala long shisha ka jingialehkai kaba itynnad haduh katta katta bad ha kaba sdang jong ka jingialehkai kata ha ka kylla step na ka liang jong ka Mylliem SC kala ioh ban thep haduh 2 tylli ki kol bad lyngba kitei ki ar tylli ki kol bala ioh ban thep da u Donbor Nongsteng ha ka minit kaba 17 bad u Thrainding K.Iong ha ka minit kaba 45+1 ka Mylliem kala don hajan jong ka thong.

Hynrei haba wan phai pat sa ha ka jingiakhun jong ka kylla miet na ka liang jong ka Laban ruh kam shymla rit mynsiem satia hynrei kala iakhun tyngeh ban ioh pynphai ia kitei ki ar kol bad da ka jinglah ki rangialehkai jong ka Laban ban iakhun dohiap kala pynkyndit ia ka Mylliem bad ki paidbah nongwan peitkai hadien ba ka Laban kala ioh ban pynphai ia kitei ki ar kol bad pyniakhaid noh ia ka jingiakhun.

Ia kitei ki ar tylli ki kol ba ka Laban kala ioh ban pynphai kidei kiba la ioh ban thep da u Bikison Kharkongor ha ka minit kaba 51 bad u Lansing Kharumnuid ha ka minit kaba 57 bad dei ruh kitei ki ar kol ka Laban kala nang ioh mynsiem kat haduh ba kala lah ruh ban ialehkai khambha shuh shuh.

Hynrei katba ka jingialehkai kala nang iaid sha ki minit kiba khatduh ka Laban kala pynkyndit ia ka Mylliem kumba iuh tdong bsein hadien ba kala shah thep biang sa shi kol ia kaba la ioh ban thep da u Donborlang Nongkynrih ha ka minit kaba 75 bad kaba la pynjan shuh shuh ia ka Laban shajan ka thong jong ka jingjop bad dei ruh sa ha ka minit kaba 90+3 u Nehipaia Lamare u la ioh ban pynskhem syndon ia ka jingjop lyngba ka kol kaba saw ia ka Laban SC.

Ha katei ka sngi ia ka nam man of the match la ioh ban khur da u Arkwis Wanniang jong ka Laban SC u bala lah ban ialehkai bha kat haduh ba u la ioh ban pynbun ia shibun tylli ki bol na.ka bynta ki paralok ba kin thep kol suk bad na ka liang jong ka LSC kala pyntip ba ka jingiakhun phainal jong katei ka lympung kan long ha ka 6 tarik u Lber Ha kaba ka Laban SC kan iakhun pyrshah ia ka Ryntih SC.