Hapdeng ka jingmaham ka suinbneng bad hap slap ym kynrandien ki riewngeit ban iaid proseshon

MM Thaiang

Jowai: Ki riewngeit ka Balang Katholik Kyndongtuber, Mooksiang Parish, West Jaintia Hill District, kiba la iaid ka jingpynkhreh rakhe shispah snem ka jingwan ka Balang Katholik ha shnong jong ki ka la kut hynnin ka sngi da ka Proseshon Iukharist ha kaba da ki hajar ngut ki riewngeit napoh ka Jyllaniam Jowai, ki riewngeit na ka KynhunBalang Presbyterian, Church of North India bad ki riewngeit na ka Niamtre ki la ia wan ban sakhi ia kane ka jingpynkut ia ka jingrakhe jingdap shispah snem ka jingwan ka Balang Kathlik ha Kyndongtuber.

Ha ka por iengsngi (10 baje AM) la pynlong ia ka jingknia Mass bakhuid kaba la lamkhmat da u Most.Rev. Victor Lyngdoh DD, Bishop ka Jyllaniam Jowai ha ryngkat ka jingsynran ki Lyngdohsohblei kiba wan na ki Parish bapher bapher jong ka Jyllaniam bad nabar.

U Bishop Victor ha ka jingkren sneng kren kraw (homily speech) bad ka jingbatai ia ka ktien ka jong u Blei ia ki paidbah, u la pynpaw ia ka jingkmen ka bakhraw ban iashim bynta lang bad ki riewngeit ka Balang Kyndongtuber ha kaba pynkut ia ka jingrakhe jingdap shispah snem ka jingwan jong ka Balang ha shnong jong ki bad ainguh ia u Blei ba ha kine ki shispah snem ki paidriewngeit jong ka Balang ki la iaid shaphrang ha ka jingbun paid bad ha ka jingieid ia u Blei. Ha ka juh ka por u la pynpaw ia ka jingkmen ka bakhraw ia ka jingiawan shim bynta ki para Khristan na ka kynhyn Balang Presbyterian, Church of North India, ia ki riewngeit na ka Niamtre bad ia kiwei de ki kynhun Balang kiba la iawan sakhi ia kane ka sngi pynkut ia ka jingrakhe jingdap shispah snem ka Balang Katholik ha Kyndongtuber bad ban iaroh ia u Blei Uba la wan longbriew sha kane ka pyrthei bad Uba shongrieh ialade hapoh ka dur jong u Kpu uba la pynkyntang.

U Bishop Victor haba kren ha kane ka sngi ula kren halor ka phangpdeng “ U Jisu Khrist u la jop ia k jingiap bad u la mihpat na kaba iap bad ka jingmihpat jong u Khrist ka dei kaba shisha”. U Bishop Victor u ong bay m pat don lum jingtep jongno jongno ha ka History ba la plie thylli. Baroh ki jingtep jong ki Syiem ka pyrthei, u Syiem Pharo ka  Egypt, ki Kaisar jong ka Rome, ki Syiem Raja jong ka ri India, ki Patsha jong ka France kim thylli kumba thylli ka jingtep jong u Jisu wat lada la donki nongap ban peit ban khmih bha ha ka por tep laitnoh tang ka jingtep jong u Jisu bad kane ka la pynshisha na ka jingong jong u Jisu hi kaba ong “ NGAN SA PYNPRA IA KA TEMPLE BAD HADIEN LAISNGI NGAN SA PYNIENG BIANG IA KA”( Ioannis 2:18). U Khrist U la jop ia ka jingiap bad ka Pop da ka jingmihpat jong u bad ka jingmihpat jong u ka pynlong ia ngi ban Rwai “ ALLELUIA”ha kaba kum kane ka sngi bad ha baroh shilynter ka jingim jong ngi ki Khristan. Ka jingmihpat jong u Khrist ka ai ka jingkyrmen ia ki briew ban mihpat lem bad u Khrist shisien ka sngi.

Nangta u Bishop Victor u la kren halor ki kyntien jong u Jisu kaba ong “Suk kiba duk, ka Hima u Blei ka long ka jong ki” bad u ai ka jingmaham da kaba ong “ Kyrdit ia phi kiba riewspah” Kane ka jingialap jong u Jisu ka long pyrshah wat ia ka jingpyrkhat jong ki Ju kiba khein ba ka jingriewspah ka dei kawei na ki jingkyrkhu jong u Blei, hynrei pat ha ka jingmut jong u Jisu ba ka jingriewspah barabor ki hap ha ka thliew jong ka jingsngew hangngamei. Ka spah ka pynlong ia ki ban sngewsarong bad ban nion bein ia kiwei bad bunsien ka spah ka pynngop ia ki ha ki jingpynshoi kiba har-rukom ban shuh shuh u Bishop Victor. Nangta u Bishop Victor u ong ban long kiba duk kam dei ka jingkyrkhu da shisha, hynrei bn sngewthuh ba ngi long kiba duk naba kiba duk ki shaniah ha u Blei bad pynlong ia ki kiba sngewrit bad kiba lah ban sngewthuh ia ka khia ka shon jong kiwei. La nangpynkhraw shuh shuh ia kane ka sngi da ki jingrwai bad ki sur siang jong ka Kynhun nongrwai Trinity na Shillong bad na ka Kynhun nongrwai jong ka Balang Presbyterian Kyndongtuber,

Ha ka por nohphai sngi la pynlong ia ka jingiaid Proseshon Iukharist hapoh ka shnong kaba la lamkhmat da ka Savio Juniorate Band Shillong bad mar ia sdang ban iaid ia ka Proseshon sdang ka jinghap slap, hynrei ki paidriewngeit kim shym la kynrandien bad iaid ia ka Proseshon ha ryngkat bad u Jisu uba shongrieh ha ka dur jong u Kpu ban kyrkhu ia ki paidbah bad ia ki nongshong shnong jong ka Kyndongtuber ba kin nangioh ia ka shait ka nang, ka bha ka miat ha baroh ki liang jong ka longbriew manbriew, ha ka jingkoit jingkhiah bad ha ka roi ka par.

Hashwa ban ioh ia ka jingkyrkhu kaba kyrpang da ka Sakrament bakhuid tam ka Duwan da u Bishop, la ioh ia ka jingkren kaba sngewtynnat ha kaba iadei bad kane ka sngi da u Phadar Ioannis War Pakma SDB bad kham ha shwa la ioh ia ka jingkren pdiangsngewbha da u Phadar Joy, u Parish Priest jonjg ka St. Claret Parish Mooksiang.