Ym pat patiaw, ka sorkar ban khot ia kren ia ki 13 seng

Shillong,27 Lber:
Haduh mynta ki 13 sengbhalang ki dang ap khmih lynti ba ka sorkar kan khot ia kren ia ki halor ka ILP, hynrei katkum ki lad khubor la ioh jingtip ba ka sorkar jylla haduh mynta kam pat pynleit jingmut ban khot ia kren ia ki sengbhalang.Shuh shuh la ioh jingtip ba ka sorkar jylla kam pat shym la don jingmut ban khot ia kren ia ki sengbhalang halor ka ILP, hynrei ka pyrkhat ban wanrah da kiwei pat ki ain kiba bun, ban teh lakam ia ka jingwan rung kyrthep u mynder ym ban pyntrei kam da ka ILP.
Lah ban kdew ba na ka liang ki sengbhalang ki la phah jingthoh sha ka sorkar jylla ban khot ia kren noh halor ka ILP, bad ka jingthoh mynta ka la jan poi sha ki lai taiew hynrei haduh mynta ym pat iohi dak eiei ba ka sorkar kan khot ia kren ia ki, khyndiat sngi mynshuwa na ki jingkren jong u General Secretary ka KSU u bah Auguster Jyrwa la sngewthuh ba ki sengbhalang ki la ap la kumba ar taiew tam , bad ki la kyntu ia ka sorkar ban khot ia kren noh.
Lah ruh ban pynkynmaw biang, ba ka sorkar ka la ai haduh 52 tylli ki ain ia ki sengbhalang ba kin pule bniah, khnang ban wanrah da kitei ki ain ha ka jaka ka ILP.