Mynta ka sngi ka jingiakhun Semi Final ba khatduh jong ka lympung RMKOFT

Nongstoiñ: Ka jingiakhun Semi Final kaba khatduh jong ka lympung kynjatbol kaba la tip kum ka Rani Motor’s Knock out Football Tournamement bala pyniaid da ka Laitkseh Sport Club (LSC) kan long mynta ka sngi ha kaba ka kynhun ialehkai jong ka Mylliem SC kan iakhun pyrshah ia ka Laban SC.
Kitei ki ar tylli ki kynhun kila long kiba la pynkhreh bha bad la khmih lynti ruh ba katei ka jingiakhun semi final ba khatduh hapdeng kitei ki ar tylli ki kynhun kan long kaba itynnad bha namar kan dei ruh ka jingiaknieh ban ioh rung sha ka phainal jong katei ka lympung.
Ka Mylliem SC kadei ka kynhun kaba la lah ban pynliem noh ia ka 7 Wasa ha ka jingiakhun ia ka Quarter Final katba ka Laban SC pat kala pynliem noh ia ka kynhun ialehkai jong ka Boca Junior na Garo Hills ha jingiakhun Quarter Final bad kawei na pdeng kitei ki kynhun ka ban ioh ia ka jingjop ha katei ka semi final ba khatduh kan sa ia kynduh pat sa ia ka kynhun ba khlain bor tam jong katei ka lympung kata ka Ryntih SC na ka bynta ban iaknieh pat sa ia ka nam lahduh.
Katei ka jingiakhun Semi Final ba khatduh kan sdang ha kapor 1:30 PM ha ka madan Mawkynjoin Laitkseh bad na ka liang jong ka LSC sa shisien ka khot ka wer ia baroh ki paidbah riew ieid phutbol jong ka thaiñ ba kin wan ban sakhi dala ki jong ki khmat ia katei ka jingiakhun.